Charter Document - 02360546
| Charter Number: | 02360546 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1252 - 1253 |
| Date type: | Internal, A.D., Feast |
| Resource Link(s): |
|
Charter:
Omnibus presentes litteras inspecturis magister Petrus abbas Castricensorii frater Bernardus ordinis Grandimontis corrector domus de Charboneres David archipresbiter Avalon Hugo de Maigni archipresbiter de Quarreis Petrus dictus Minoz curatus Sancti Martini de burgo Avalon et dominus Bernardus incuratus de Stabulis salutem in Domino Noveritis nos litteras venerabilis patris Guidonis episcopi Lingonensis non cancellatas non abolitas nec in aliqua sui parte viciatas vidisse sub hac forma Guido divina permissione Lingonensis episcopus decano Reomensi salutem in Domino Noveritis quod nos dedimus dilecto nostro Petro de Mino canonico Lingonensi potestatem recipiendi vice nostra resignationem ecclesie de Veteri Castro a magistro Petro de Flavigniaco incurato de eadem et etiam conferendi eandem persone ydonee ad presentationem capituli Avalon unde vobis mandamus quatinus personam quam vobis presentabit dictus Petrus de Migno in possessionem ejusdem ecclesie inducatis vel procuratorem ipsius Datum anno Domini MCC quinquagesimo secundo die veneris ante Purificationem Beate Marie Virginis Dictus autem Petrus de Migno magistrum Jacobum de Flavigniaco recepit ad ecclesiam de Veteri Castro vacantem per resignationem magistri Petri de Flavigniaco canonici Lingonensis ad presentationem capituli Avalon nobis et aliis ad hoc vocatis presentibus et videntibus Dictus autem decanus Reomensis induxit dictum magistrum Jacobum in corporalem possessionem dicte ecclesie de Veteri Castro de mandato dicti Petri de Migno prout in litteris dicti episcopi superius annotatis continebatur Datum et actum anno Domini MCC quinquagesimo secundo mense aprili die veneris ante ramos Palmarum In cujus rei testimonium et memoriam presentibus sigilla nostra apposuimus