Charter Document - 02360542

Omnibus presentes litteras inspecturis Nicholaus de Manoto ballivus Senon salutem in Domino Noverint universi quod cum contencio esset inter decanum et capitulum Autissiod ex una parte et preceptorem et fratres milicie Templi in Francia ex altera super hoc quod dicti Templarii dicebant se habere usuarium in toto nemore dicti capituli quod vocatur nemus de Barro ad pasturam omnium animalium suorum de domo sua de Monestallo sive de novo esset abscisum id nemus sive non quod e contrario dictum capitulum denegabat Tandem inter partes talis composicio intervenit videlicet quod dictum capitulum assignavit medietatem dicti nemoris dictis Templariis ad pasturam animalium suorum de dicta domo de Monestallo exceptis capris aliam vero medietatem dicti nemoris poterit capitulum ponere in foresta in qua non poterunt dicti Templarii ponere aliqua animalia quousque illa medietas que erit in foresta compleverit quinque annos quibus completis poterit dictum capitulum vendere forestam illam si voluerit vel servare Poterit eciam aliam medietatem Templariis assignatam capitulum scindere et in foresta ponere et tenere donec compleverit quinque annos Et interim in alia medietate quam capitulum tenuit in foresta poterunt dicti Templarii ponere animalia sua ad pasturam et si contigeret quod illa medietas nemoris quam tenuit capitulum in foresta et alia quam Templarii tenuerint ad ponendum sua animalia in pastura complevissent quinque annos tunc dicti Templarii in toto nemore et in qualibet parte tocius nemoris que complevisset quinque annos poterint sua animalia ponere ad pasturam Poterit autem capitulum libere vendere vel scindere de nemore predicto prout sibi placuerit dumtamen medietatem dicti nemoris assignet ad pasturam animalium predictorum nec capitulum poterit aliquibus de novo concedere pasturam in dicto nemore Debet autem dictum capitulum ita nemus dividere quod animalia dictorum Templariorum possint competenter intrare ad pasturas et redire Illos vero qui ante compositionem istam consueverunt mittere animalia sua in dicto nemore permittet capitulum si voluerit mittere in dicto nemore sua animalia sine aliqua contradictione ita tamen quod ab illis nullum commodum recipiat propter illam permissionem Et quia infra dictum nemus sunt aliqua arpenta que tenentur ad censum a capitulo concordatum est quod si ad manum capituli devenerint secundum ordinacionem supradicti nemoris censebuntur Quamdiu vero extra manum capituli erunt capitulum non se opponet quin in illis possint uti Templarii sicut prius De predictis autem conventionibus debet capitulum tradere litteras suas et litteras episcopi Autissiod et Templarii debent tradere litteras preceptoris milicie Templi in Francia et tesaurarii Templi Parisiensis Debent autem mutuo tradi littere supradicte infra mensem ex quo preceptorem Templi Francie Parisius contingerit devenisse et de predictis conventionibus firmiter observandis obligavit se quelibet parcium sub pena centum marcarum argenti et dederunt fide jussores videlicet Templarii Nicholaum Arrode Theobaldum de Novo Vico et Thomam Teboudi capitulum vero archidiaconum Cartonensem Gaufridum archidiaconum Autissiodor et Petrum Guignorri Traditis vero litteris supradictis plegii supradicti remanebunt penitus absoluti Ego vero Nicholaus de Manoto ballivus Senon plegios de assensu partium in manu mea recepi et presentes litteras ad peticionem parcium sigillavi in hujus rei testimonium et munimen Nos autem Herbertus ecclesie Autissiod decanus et Petrus tesaurarius Templi in robur et firmitudinem composicionis predicte sigilla nostra duximus presentibus litteris apponenda Actum Parisius anno Domini MCC quinquagesimo primo primo die veneris post Brandones