Charter Document - 02360523

C'est li diz et la prolacions de l'arbitrage A tous ceus qui verront ces présentes lestres Guillaumes trésorier de Senz Huedes archidiacre d'Estampes et Guiz de Vernoil chevalier salut en Nostre Seignor Nos fasons asavoir à touz que comme contens et descorde fussieent meues et eussent esté meues de lonctens ça en arriers trespassé entre les honorables homes le deien et le chapitre de Senz d'une part et monseignor Jehan dou Pleissie chevalier d'autre seur la joustise de Pont seur Yone tant seur la grant joustise quant seur la petite Derichief seur ce que li devant dit deiens et chapitres se complaignoient que lidiz Jehans lor fesoit vilenie seur le sas dou moulin seur une isle assise à Ponz sur Yone delez le leu où li moulins fu jadis Item seur le cens d'une meson qui fu jadis feu Alart assise à Ponz Item seur lices jadis destrutes et despéciées et seur maintes autres injures lesquex lidit deiens et chapitres disoient que lidiz Jehans lor avoit fetes Et ensorque tout seur ce que li diz Jehans disoit que li diz deiens et chapitres fesoient vilenie à cel dit Jehan seur les estaus seur le ban et seur les lices de Ponz sur Yone et autres maintes injures lesquex li diz deiens et chapitres avoient fetes audit Jehan si com il disoit A la parfin lesdites parties se sont mises et ont fet compromis entre nous Huede arcediacre d'Estampes et Gui de Vernoil chevalier et ensorquetout en nos Guillaume trésorier de Senz moienier éleu seur poine de deus cens marz d'argent seur toutes les descordes les contens et les injures devant dites pardevant l'onorable père Gile par la grâce de Dieu arcevesque de Senz Prometant lesdites parties seur la poine devant dite que il tenront et garderont fermement quelconque chose haut et bas par prison ou par jugement sera de nostre franche volenté ordené ou arbitré seur toutes les choses desus dites Lou terme toute voies aloignié de l'assentement de l'une et de l'autre partie dedans louquel terme ladite ordenance ou li diz arbitrages devoit avoir esté diz et prononciez jusques au prochaines octaves de Sainte Marie Magdelene A la parfin lou venredi après les octaves de la feste aux apostres Saint Père et Saint Pol assenée ausdites parties à oir l'arbitrage les devant dites parties en la présence dou devant revoirans père arcevesque et en la nostre présence establies reconnaissans la devant dite mise ou le devant dit compromis avoir este fete et acordée si com il est desus expressément et requérans lou dit arbitrage estre dit et prononcié Nos prononcemens nostre dit en ceste menière de la petite joustise et deimes en tel menière que li diz Jehans auroit la petite joustise en sa terre et en son fié Laquel chose li diz Jehans a dedanz la ville et la parroche de Ponz et en la terre Saint Rémi et Saint Père dedanz cele meisme parroche et cele meisme ville Et li diz chapitre la petite joustise en sa terre et en toutes autres terres de quexconques censives eles soient dedanz cele meisme ville et cele meisme parroche fors que en la terre et ou fié que li diz Jehans a si com il est dit desus dedanz la ville et la parroche de Ponz et fors que en la terre Saint Rémi et Saint Père dedanz celle meisme ville et celle meisme parroche Sauf ce que li home dou chapitre et li home le Roi en quelque leu que il soient couchans et levant dedanz la dite parroche et la dite ville seront de la joustise au chapitre Mes li chapitres ne les porra gagier ne de lor choses pranre seur la terre ou seur le fie que li diz Jehans a dedanz la ville et la parroche devant dite ne seur la terre Saint Rémi ne Saint Père dedanz cele meisme parroche et cele mesme ville se lan ne requiert avant licence doudit Jehan ou de ses sergens Laquex licence puisque ele aura esté requise ne doit pas estre refusée aux requéreurs de par le chapitre Et se ele lor est déniée li chapitres ou si sergent porront gagier ou pranre de lor choses seur la terre et lou fié que li diz Jehans a dedanz la ville et la parroche devant dite et seur la terre Saint Rémi et Saint Père dedanz cele meisme ville et celle meisme parroche Ne ja por ce il ne feront injure audit Jehan Adecertes li home et oudit Jehan en quelconque leu que il soient couchans et levant dedanz la ville et la parroches devant dites seront de la joustise audit Jehan Mes li diz Jehans ne les porra gagier ne pranre de lor choses en la terre au chapitre ne es autres terres de quexconques censives eles soient hors la terre et le fié que ciz meismes Jehans a dedanz la ville et la parroche devant dites ne hors la terre Saint Rémi ne Saint Père dedanz cele meismes ville et cele meisme parroche se licence n'a esté avant requise dou chapitre ou de ses sergent laquex licence puisque ele aura esté requise ne doit pas estre déniée aux requéreurs Et se elle est déniée li diz Jehans ou si sergent porront gagier ou pranre de lor choses es terres devant dites ne ja por ce ne feront injure au chapitre Toutevoie se aucun auront esté priz à présente mellée ou à autre présent forfet qui aparteigne à petite joustise en la terre dou chapitre et en autre terre de quelconque censive ele soit dedanz ladite ville et ladite parroche hors la terre et le fié que ciz meismes Jehans a dedanz cele meisme parroche et cele meisme ville et ensorque tout hors la terre Saint Rémi et Saint Père se joustiseront de ce par le chapitre Et ausiment se aucun auront esté pris à présence mellée ou à autre présent forfet qui aparteigne à petite joustise en la terre et ou fié que ciz Jehans a dedanz la ville et la parroche devant dite ou en la terre Saint Rémi et Saint Père se joustiseront de ce par loudit Jehan Adecertes li home est rangé à cuiconque il soient home qui ne sont home dou chapitre ne dou roi li quel seront couchant et levant en la terre et ou fié que ciz meismes Jehans a dedanz ladite parroche et ladite ville ou en la terre Saint Rémi et Saint Père se joustiseront par loudit Jehan par an tel menière comme li home de ce meisme Jehan et ansinc li home estrangé à cuiconque il soient home liquel toutevoie ne soient pas home audit Jehan liquel seront couchant et levant en la terre dou chapitre et es autres terres de quelconque censive ele soient fors que en la terre et ou fié que li diz Jehans a dedanz ladite parroche et ladite ville et fors que en la terre Saint Rémi et Saint Père se joustiseront par le chapitre par tel menière comme li homme dou chapitre et dou roi De la grant joustise nos avons dit en tel manière que se aucuns de quelconque seignor il soit hons aura esté pris ou arrestez dedanz la devant dite ville et la devant dit parroche por larrecin ou por autre forfet qui apartiegne à la grant joustise en quelconque terre de quelconque seignor il aura esté pris ou arrestez dedanz la ville et la parroche devant dite il doit estre amenez aux sergens dou chapitre et doit estre détenuz par iceus en tel menière c'est à savoir que se il aura esté pris ou arrestez à présent forfet qui apartiegne si com il est dit desus à la grant joustise li chapitres ne lou porra détenir ne mes tan seulement que par un jor et une nuit qu'il ne soit bailliez aux sergens dou dit Jehan et de monseignor Gautier de Nemos chevalier ou au sergent de l'un d'aus à la bone qui est assenée à ce fere Si que par celui sergent ou par ceaus sergens la poine soit donnée au forfesant tele come l'an li devra donner et devra avoir por son forfet qu'il aura fet Et ad certes se aucuns aura esté pris ou arrestez por larrecin ou por autre forfet qui apartiegne à la grant joustise de quoi il ne soit convaincuz et confès la connoissance de ceste chose appartanra au chapitre Mes puis que li chapitres aura eue la connoissance si com il est dit dou forfet que li forfesans aura fet que lan li aura mis sus li chapitres ou li sergent ne lou porront détenir fors seulement que par un jor et une nuit qu'il ne soit bailliez au sergent doudit Jehan ou doudit Gautier ou au sergent de l'un d'içaus à la bone qui est assenée à ce fere Si que par celui sergent ou par içaus sergens la poine soit donnée au forfesant tele com il devra avoir por son forfet si com il est dit desus expressément De la fausse mesure de la remaisance des estrangés et dou crieur nos avons prononcié en tel menière que se il soit ainsinc come il estoit avant la prolacion de cest arbitrage cest à savoir premièrement de la fausse mesure par tel menière que li diz Jehans ou li diz Guiz ne poissent pranre à Ponz en la terre dou chapitre jusquau tant qu'il aura esté monstré au sergent dou chapitre et se li sergent dou chapitre requis sor ce i aura refusé à aler por la pranre i li diz Jehans et Guiz la pueent pranre et lever en l'amende jusquau LX s De la remansion ou remoisance nos avons dit et prononcié que se ainsinc est que aucuns estrangés viegne en la ville de Ponz il puet fere remaisance souz ledit chapitre et souz ledit Jehan et ledit Gui dedanz l'an et le jor Et si n'aura fet remaisance dedanz l'an et dedanz le jor se il aura esté en la terre dou chapitre il remandra au chapitre et sil aura esté en la terre des diz Jehan et Gui il lor remandra Dou crieur il est en tel menière car il sera establiz dou chapitre et il establiz fera foi et léauté au chapitre et aux diz Jehan et Gui et criera le de par tous ensemble Et se aucuns emolument dou crieur aura avenu li chapitres en aura la mitié et li dit Jehan et Guiz l'autre mitié Dou sac dou moulin nos avons dit que li devant diz Jehans avec le dit Gui aura la tierce partie de lémolument qui vanra dou sac dou moulin Nos avons ainsin ques dit que la devant dite yle est audit Jehan avec ledit Gui en cele menière que ele est assise en l'iaue propre dou chapitre ele est au chapitre En tel menière toutevoie que se ladite yle ainsinc come ele est assise en l'iaue commune fust ramenee en yaue l'yaue seroit commune au chapitre et aus devant diz Jehan et Gui Toute la mesons feu Allart est assise en la censive au chapitre et est et sera de sa censive Des estaus nous avons ordené que li diz Jehans avec ledit Gui aura cele meisme porcion es estaus qu'il a es fours et où sac dou moulin de Ponz et en cele meisme meniere mes quil paient toutevoie por lor part qui lor afiert des despens et des coustemens qui seront fet et qui sont à fere ou refere et où soustenement desdis estaus Dou ban nos avons ordené en tel menière que li chapitres porra vendre à ban où tens dou ban lou vin des dismes et quelque autre vin quil aura volu Toutevoie par cet atrempement que si comme sis preudome de Ponz ou de la parroche de cele ville esleu à ce auront esmé et esgardé par les sergens dou chapitre et juré se metiers est et il convient que ciz vins ne sera pas venduz plus chiers por la reson dou ban outre la quarte partie dou pris quil valoit avant le ban en tel maniere cest à savoir que ciz vins qui seroit vendus ou porroit estre venduz ou pris de sis deniers avant le ban ne sera venduz por lou ban en plus grant pris que à huit deniers et ausiment de autre vin de quelconque pris quil soit ou de quelconque valor selon la meniere devant dite Des lices nos avons dit que se lices auront esté aferé à Ponz eles doivent estre fetes par le chapitre et par les diz Jehan et Gui toutevoie se nécessitez de fere les lices aparoit jasoit ce par aventure quil despleust à l'un d'aus ja porfee ne remandroit qu'il ne l'eust à l'un d'aus fère raparillier les lices là ou il verroit quil seroit mestiers dedans la ville et la parroche devant dite toutes voies que ciz ou cil à cui il despleroit quant à ce fust gardez de domage Nos prononçons ainsinc dou messier et dou vignier quil soient esleu communément des homes de Ponz seront présenté aus sergens doudit chapitre et des diz Jehan et Gui et jureront en la presence d'içaus sergens que se il auront trové aucun forfet qui ait esté fez en la terre ou où fié que ciz meismes Jehans a dedanz la ville et la parroche de Ponz ou en la terre Saint Remi et Saint Père il lou dénoncerent ou il raporteront les gages audit Jehan ou à son sergent ou audit Gui ou à son sergent et li emolumens de l'amende sera audiz Jehan et Gui Et ausiment sil auront trové aucun forfet qui ait esté fez en la terre dou chapitre ou en autres terres de quexconques censives ele soient for que en la terre et ou fié que ciz meisme Jehans a dedans la ville et la parroche devant dites et fors que en la terre Saint Remi et Saint Père il lou nonceront ou raporteront les gages au chapitre ou à son sergent et li emolumenz de l'amende sera au chapitre Après ceste ordenance nos avons prononcié que de injures d'arrérages et de despens fez d'une partie et d'autre l'une partie et l'autre remaingne absote et quite Et nos à la requeste des dites parties avons enforcié dou garnissement de nos seauz ledit arbitrage ainsinc prononcié lou quel arbitrage les dites parties ont ferme et agréable Ce fu fet ou chapitre de Senz le venredi devant dit en l'an de Grace mil CC quarante huit ou mois de juillet Ce sont li tesmoing Jehan dou Plessis chevalier receu dou mandement nostre seignor le roi de France encontre le deien et le chapitre de Senz sor ce que ci diz Jehans entendoit à prover que li jugemenz des larrons pris à Ponz sur Yone en la terre doudit chapitre apartient et doit apartenir audit Jehan et que li dit deiens et chapitres sont tenu de rendre à lui les larrons pris au devant di leu à la bonne assenee sor ce après un jor et une nuit puis qu'il les auront pris ne ne les devent retenir en avant laquel chose lor estoit niée doudit deien et chapitre Et ont amené tesmoins à prover que il sont en possession de jugier les larrons ou les maufetors pris en la parroche de Ponz avant quil les rendent audit Jehan ou à son commandement Derichief que il sont en saisine de tenir les larrons ou les autres maufetors pris en cele meisme parroche de Ponz en présent forfet par plusieurs jorz outre un jor et une nuit quant il ne sont pas certain qu'il aient esté pris en présent forfet Derechief qu'il sont en longue possession de tenir les diz larrons ou maufetors pris en la dite parroche et en présent forfet jusquau tant quil soit certain à aus ou quil aist esté prové par devant lor joustisiers qu'il aient esté pris en présent forfet et l'entendent à prover tant par ces tesmoingz quant par aucunes lestres fetes entre aus il est dit et déterminé que li chapitres jugera le larron ou le maufetor pris en la ville et en la parroche de Ponz et li diz Jehans dou Pleissie déclarera par consoil ou par jugement en sa cort puisque li maufetors li sera renduz en quel menière il doie estre puniz Derichief il est dit et déterminé que li dit deiens et chapitres ne puissent ce moisme larron ou maufetors tenir outre un jor et une nuit puisqu'il aura esté pris en présent ou convoincus pardevant chapitre