Charter Document - 02360517
| Charter Number: | 02360517 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1248 |
| Date type: | Internal, A.D. |
| Resource Link(s): |
|
Charter:
Universis presentes litteras inspecturis ego Guillermus decanus Tornodori et ego Hugo officialis ejusdem loci salutem in Domino Noverit universitas vestra quod in nostra presencia constitutus nobilis vir Theobaldus de Planceyo miles dominus Sancti Winimerii recognovit se dedisse et in perpetuam elemosinam concessisse ecclesie Beati Michaelis Tornodori pro anniversario suo annuatim in eadem ecclesia faciendo quidquid habebat in hominibus et reditibus et modis omnibus et commodis in villa que Pimella nuncupatur promittens per fidem suam in manibus nostris corporaliter prestitam quod contra dictam donationem per se vel per alium non veniet in futurum nec aliquid in rebus predictis de cetero reclamabit Hanc autem donationem Guillerma domina Bacerne uxor ejus laudavit voluit et concessit spontanea non coacta promittens per fidem suam in manibus nostris corporaliter prestitam se contra dictam concessionem per se vel per alium de cetero non venturam renuntians omni exceptioni sibi competite vel etiam competenti omnique beneficio juris tam canonici quam civilis In cujus rei testimonium ad peticionem supradictorum nobilium viri Theobaldi et Guillerme uxoris ejus presentibus litteris sigilla nostra apposuimus Actum anno Domini millesimo ducentesimo quadragesimo octavo mense julio