Charter Document - 02360506

Nos Thiébaus par la grâce de Dieu roi de Navarre de Champagne et de Brie cuens palazins faisons à savoir à tous cels qui verront ces lettres que par les enquestes que nos fismes faire par l'assant dou signor de Montréal d'une part et l'abbé et le couvent d'Aucuerre et le priex de Cortanoul d'autre sur ce qu'ils disoient que le sire Montréal qui or est les désaisissoit et efforceoit eux et leurs homes de Cortanoul de Massangi de Dissangi et de Trumenci et empeschoit leurs us en maintes choses avons trouvé que ou temps du père le signor de Montréal qui or est li prieur de Cortanoul estoit en saisine du bois que l'en appelle le bois de la Chapelle Saint Germain à essarter à donner et à vendre et à faire charbon et à faire sa volenté en toute manière sans empeschement dou signor de Montréal et la justice de ce leu et des terres de ce bois quant il est essarté estoit saisy li devant dit priex à tens dou pere le signor de Montréal qui or est liquex bois dure dez le lans du bois as moines de Rigny jusques en lans dou bois ou la signorie de Noiers a signor commence et dez les lans a signor de Noiers dure jusqu'à lans monsignor Milon de Joins et en cel mesme temps l'abbé et li couvens de Saint Germain et li prieuz devant dits et li home des devant dites villes estoient saisies de l'usuaire dou bois Sainct Germain que l'en appelle Hérival si comme la partie Sainct Germain l'aport à penre le mort bois por ardoir et le vif por édefier mais de l'édefier li homes doivent prendre congé au seignor de Montréal ou à son commandement et li moines non et de ce bois se l'on en vendoit la metié prenoient li sire de Montréal et li dit priex l'autre aussin prenoientils par metié le miel et la cire des bezaines quant estoient trouvées en ces bois et tous les exploits qui avenoient en ces bois prenoientil par metié et le passage des porciax qui y aloient fors que de ceux qui estoient au priex qui ne paie point le passage Et dès lors li hospitelier de Savi aloient à l'us dou bois à une charrette et li priex en cel temps y alloit chacier et li homme devant dit en cel bois et ou plain et alloient peschier en la rivière de Serain franchement sans defais le signor de Montréal et de son commandement dez le molin de Dissangi au val jusqu'à Grimaut et dès lors estoit saisy li sire de Montréal de mettre les forestiers an Hérival ou li moines et lour homes davant dit avoient usuaire An cil mesme temps estoit en saisine li prieur de prendre les bestes à ces de Regni qui venoient as pastures de Massangi et de Cortanoul et Champrotart et retenoit et despandoit par sa volanté sans garentie dou signor de Montréal En cel mesme temps li priex estoit saisy de la justise de Cortanoul fors que des homes lou signor de Montréal qui estoit saisy devant d'avoir la metié de la taille se li priex la faisoit à laquelle taille faire il appelloit le signor de Montréal de la justice de Massangi dès le Loir en amont estoit saisy li dict priex et de toutes escheoites de ses hommes et li sire de Montréal des escheoites des suens et de la taille ou queste ou autres exploits si l'en li faisoit En toutes choses prenoit li priex les deux parts et li sire de Montréal l'autre part Dou giste à véneors dou pain por les chiens et dou chanvre por les liens à chiens ne trovons pas clairement la saisine et por ce retenons ce jusqu'à tant que nos en soyons plus certain et volons et comandons que chacun soit à la saisine des avant dites choses si comme il est ci devant devisé Et des autres choses qui n'appartiennent pas à l'enqueste nos ne recevons rien ne comandons ne volons fors tant que nous en ferons droit si come nos devons si chacune des parties se plaint à nos Et por ce qu'aucuns tesmoins dient que li sire de Montréal qui or est a désaisy ces de Sainct Germain d'aucune partie de lors tierces qui sont dedans lou finage des villes devant dites volons que par ces tesmoings et par autres soient devisées les terres ou cil de Sainct Germain prenoient la tierce dont li sires les dessaisit Anno Domini millesimo ducentesimo quadragesimo quinto mense februarii