Charter Document - 02360504

Venerabili in Christo patri Dei gracia archiepiscopo et dilectis in Christo decano et capitulo Senon Odo miseracione divina Tusculani episcopus apostolice sedis legatus salutem et sinceram in Domino caritatem Rationis reddende necessitas de villicatione suscepta nos innutat et urget ut de regno Dei suborientia tollamus scandala illa precipue que divinum cultum offuscare seu deshonestare noscuntur Ideoque ad ecclesiam vestram personaliter accedentes quedam licet pauca repperimus que propter honestatem et decorem tante ecclesie omnino oportuit amoveri alia vero in melius reformari In primis igitur legationis qua fungimur auctoritate districte precipiendo mandamus quatinus illa festorum antiqua ludibria que in contemptum Dei opprobrium cleri et derisum populi non est dubium exerceri videlicet in festo Sancti Johannis evangeliste Innocentium et Circumcisionis Domini juxta modum pristinum nullatenus faciatis aut fieri permittatis sed juxta formam et cultum aliarum festivitatum que per anni circulum celebrantur ista volumus et precipimus celebrari ita quod ipso facto sentenciam suspensionis incurrat quicumque in mutatione habitus aut in sertis de floribus seu aliis dissolutionibus juxta predictum ritum reprobatum adeo in predictis festivitatibus seu aliis amodo presumpserit se habere Ceterum quoniam divinum officium in quibusdam in ecclesia vestra cognovimus minus decenter impleri ab hiis presertim qui invitatorio cantando hora debita non intersunt et ab hiis eciam qui recedunt a laudibus beneficio temporali suscepto necnon eciam ab illis qui frequenter egrediendo de choro sincopant matutinam volumus et presenti constitutione sanctimus ut quicumque pro tempore a modo pro cantando invitatorio in tabula inscribentur ita se studeant preparare quod et chorum simul intrent et sine aliquo intervallo postquam sacerdos matutinalem horam inceperit similiter invitatorium incipiant decantare Quicumque vero super hoc defectum fecerit emolumentum temporale matutinarum amittat Et quia justum est ut quos amor Dei ad servitium suum retinere non valet beneficiis saltem temporalibus teneantur volumus et ordinamus ut tercia pars distributionum matutinalium nulli amodo tribuatur nisi ei qui laudibus studuerit interesse et hoc usque adeo volumus observari donec eis qui matutinalibus laudibus interfuerint dictum capitulum seu alius competentem redditum duxerit assignandum Illo vero tempore quo hore decantantur in choro nullus de choro agredi absque necessitate seu aliqua utilitate presumat Quod si fecerit illius hore beneficio sit ipso facto privatus Egressi vero plausum aut tumultum non faciant per que servitium valeat impediri set nec aliquo loco ubi ab hiis qui in choro fuerint videri valeant audeant commorari Item quicumque in choro offitium ecclesie turbaverit aut aliud quam de necessariis loqutus fuerit et hoc etiam voce submissa aut causa garriendi de stallo in stallum transierit benefitio illius hore careat in qua hujusmodi presumpserit perpetrare et hoc idem in anniversariis volumus observari Nullus preterea clericus seu canonicus dum hore in ecclesia decantantur extra domum in claustro absque regulari habitu diucius commorari presumat et quicumque super hoc notabilis inventus fuerit si per decanum aut precentorem prout jurisdictioni eorum subesse noscantur se super hujusmodi voluerint emendare si clericus est ejiciatur a choro si canonicus per capitulum pena debita patiatur Set nec clericus nec canonicus extra clausum quacumque occasione sine capa vel pallio pueris de choro dumtaxat exceptis incedere seu stare presumat Illi vero qui ad impositionem regentes chorum antiphonam seu aliud quicquam sibi impositum legere neglexerit aut cantare illius hore temporali benefitio ex nostra ordinatione noverit se privatum Ille etiam modus cantandi habeatur in choro ut in psalmodia in medio versus metrum cum pausa ab omnibus observetur Nec unus chorus aliquo modo incipiat quousque alter chorus plene finierit versum suum Item districtius inhibemus ne canonicus aliquis capellanus seu clericus de choro in domo propria seu propinqua mulierem aliquam tenere presumat ad servicium vel ad cibum nec eciam in domo sua pernoctare permittat nisi sit mater vel soror seu propinqua saltem in tercio gradu canonici seu capellani penesque pernoctabit vel nisi alique magnates mulieres que sine scandalo evitari non possunt ad eorum domos causa familiaritatis hospitare duxerunt divertendum vel nisi necessitate urgente matronas aliquas ab eisdem aliquando vocari contigerit ad custodiam infirmorum Hec autem ad presens vobis presentibus litteris exprimenda decrevimus alia vero super quibus plene deliberare non poteramus ad presens cum nobis vacaverit et oportune fuerit transmittemus Observantes in Christo ut hec que pro salute animarum vestrarum et honestate ecclesie vestre duximus ordinanda recipiatis benigne et cum omni diligentia curetis effectui mancipare facientes ea saltem in hac novitate quater in anno in Capitulo legi ne aliquis forte per ignoranciam se valeat excusare Nulli ergo omnino hominum liceat aliquatenus premissa infringere vel eis ausu temerario contraire Si quis autem hoc attemptare presumpserit indignitatem omnipotentis Dei et beatorum Petri et Pauli apostolorum ejus se noverit incursurum Datum Senon IIII idus novembris anno Domini MCC quadragesimo quinto