Charter Document - 02360501
| Charter Number: | 02360501 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1244 |
| Date type: | Internal, A.D. |
| Resource Link(s): |
|
Charter:
Ego Guichardus Dei gratia abbas Virziliacensis totusque ejusdem loci conventus notum facimus presentibus et futuris quod nos de communi assensu capituli nostri concessimus excellentissime domine Blanche regine uxori bone memorie domini Ludovici quondam regis Francorum in vita sua plenariam societatem et beneficium ecclesie nostre tam in capite quam in membris Cum autem ipsam decedere contigerit tantum faciemus pro ea quantum pro uno ex professis nostris ita scilicet quod audito ejus obitu statim missa sollempniter celebrabitur in conventu et tricenarius fiet pro ea et in eodem tricenario cotidie uni pauperi quotidiana refectio tribuetur Habebit etiam a singulis monachis sacerdotibus tres missas ab aliis qui sacerdotes non fuerint unum psalterium a quocumque a laicis singulis centum quinquaginta Pater noster et obitus ejus in regula conscribetur et anniversarium annuatim fiet et centum pauperes in die anniversarii reficientur sicut facere consuevimus anniversarium bone memorie comitis Girardi ecclesie nostre fundatoris Hoc autem domine B regine concessimus quoniam ad nos cum maxima devotione accessit et hoc ipsam a nobis humillime in nostro capitulo postulavit Indignum autem judicavimus pro ejus desiderio et devote humilitati in aliquo contraire propterea cartulam nostram ei super eodem tradidimus sigillorum nostrorum caractere consignatam Datum Viziliaci anno Domini MCCXL quarto mense septembri