Charter Document - 02360495
| Charter Number: | 02360495 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Lay |
| Charter Type(s): | Confirmation |
| Date: | 1243 - 1244 |
| Date type: | Internal, A.D. |
| Resource Link(s): |
|
Charter:
Ego Andreas dominus Rubeimontis miles notum facio universis presentes litteras inspecturis quod cum inter me ex una parte et Rainaldum abbatem ac conventum Reomaensem et homines ipsorum ac feminas de Estiveo ex altera contentio verteretur super hoc quod inquietabam et impediebam supradictos homines et feminas et eorum animalia super usuagiis in pascuis animalium et pasturis de toto territorio et finagio qui vocatur Boscus Dei et de finagio de Sarragneio et super hoc quod inquietabam eosdem super usuagio ad adaquandum animalia sua et ad agiandum lina sua et canabos et ad abluendum pannos suos et lanas in riparia mea de Rubeomonte et ad ipsam aquam bibendam et portandam prout sibi expedire videretur tandem habito bonorum consilio facta compromissione hinc inde in bonos viros et per ipsos super premissis inquisita diligentius veritate per ipsorum relationem et alio modo mihi constitit evidenter quod ipsos abbatem et conventum et maxime homines et feminas eorumdem de Estiveo super premissis indebite molestabam utpote nullum jus habens penitus in predictis Inde est quod ego volo dono et concedo quod tam dicti abbas et conventus quam ipsorum homines et femine de Estiveio uti valeant predictis usuagiis in perpetuum libere et quiete Promittens juramento prestito quod ipsos vel eorum alterum super premissis per me vel per alium nullatenus molestabo sed ad majorem explanationem volo dono et concedo eisdem in toto terragio et finagio qui dicitur Boscus Dei et in toto finagio de Sarragneio usum predictum in pascuis animalium et pasturis et aliis usuagiis ad animalia necessariis et quod usum suum habeant in perpetuum libere et pacifice in dicta riparia de Rubeomonte ad adaquandum animalia sua et ad agiandum lina sua et canabos et ad abluendum pannos suos et lanas et ad bibendum aquam et portandum prout sibi viderint expedire Et hec in ea libertate eisdem juramento prestito garantire promitto et heredes meos ad hec in perpetuum volo teneri Et hoc voluerunt et concesserunt et laudaverunt Elisabeth uxor mea Andreas et Joannes filii mei in mea presentia constituti In cujus rei testimonium presentes litteras sigilli mei munimine roboravi et in forma consimili eisdem facere et tradere teneor quamcito se facultas obtulerit litteras sigillo archiepiscopi Lugdunensis sigillatas vel alicujus persone authentice que ad hoc sufficerent si dicte littere archiepiscopi haberi non possent Et quamcito fuerit archidiaconus in archidiaconatu Tornodor alias litteras eisdem facere et tradere teneor in eadem forma suo sigillatas sigillo continentes quod tam in me quam in heredes meos et in terram meam excommunacionis vel interdicti sententiam valeat promulgare si me vel heredes meos a supradictis contigerit resilire Actum anno Domini millesimo ducentesimo quadragesimo tertio mense februario