Charter Document - 02360459

Nobilibus viris et in Christo carissimis domino T Dei gratia regi Navarre illustri et comiti Campanie dominis Nivernensis et Forensis Montis Fortis comitibus et dominis R de Courtenay et Drogoni de Marloto E miseratione divina Nicosiensis domini patriarche Jerosolymitani vicarius et H Dei gratia Nazarensis archiepiscopi et R Arconitidis et R Liddensis episcopi et H abbas Templi et G Hospitalis Sancti Johannis Jerosolymitani pauperum Christi custos et Arnaudus militie Templi magistri comes Gualterus de Brena Odo de Monte Beliardi conestabulus regis Jerosolymitani B Dominus Sydoniensis et J dominus Cesarie salutem et paratam ad obsequia voluntatem Placuit sublimitati vestre super quatuor consilium a nostra querere pravitate videlicet quando ad succursum Terre Sancte iter arripere deberetis et ad quem portum vel ad quos possetis convenientius congregari et de cibariis taliter provideretur et eorumdem inveniri posset copia cum veniret exercitus Jesu Christi Super quibus de communi consilio non tantum nostrorum qui presenti cartule sigilla apposuimus sed etiam illorum qui de natura negotii habent notitiam pleniorem taliter duximus respondere Ad primum dicimus quod occasione treugarum non oportet vestrum passagium prolongare cum Saraceni treugam non teneant Christianis imo plures interfecti et capti peregrini sunt in hac treuga quam fuerint ex quo perdita extitit Terra Sancta et cum domino pape et vobis placuerit poteritis arripere iter vestrum cum cujus benedictione et gratia vos accingetis ad servitium J Christi Ad secundum ad quos portus venire debetis videtur nobis quod omnes de regno Francie commodius ad portum Marsilie vel Janue poteritis accedere vel intrare Ad tertium dicimus tali modo quod omnes debeatis in Cyprum apud Minocium applicare et ibi habito diligenti tractu vobiscum cum prelatis magistris et baronibus Terre Sancte poteris ubi magis vobis placuerit navigare in Syriam vel Damiatam vel apud Alexandriam si magis videritis recentibus et aliis recreari totus exercitus christianus Equaliter enim distat Accon a Nimocio sicut Nimocium ab Alexandria vel Damieta Ad quartum dicimus quod fiet generale ab omnibus qui in terra dominantur interdictum quod extra terram nulla cibaria extrahantur Ita visum est nobis et ita dominus dirigat gressus vestros et velit vestrum et nostrum desiderium adimpleri et per vos liberetur de Saracenorum manibus Terra Sancta quam Patris Unigenitus presentia sua et effusione sui sanguinis voluit consecrare Datum Accon pridie nonas octobri