Charter Document - 02360444
| Charter Number: | 02360444 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1238 |
| Date type: | Internal, A.D. |
| Resource Link(s): |
TELMA - Chartae galliae |
Charter:
Omnibus Christi fidelibus ad quos presens scriptum pervenerit Edmundus permissione divina Cantuariensis archiepiscopus totius Anglie primas salutem in Domino Ad memoriam revocantes pietatis obsequia que monasterium Pontiniac predecessoribus nostris beato Thome martyri et pie memorie Stephano archiepiscopis Cantuariensibus in exilio constitutis abundanter et hylariter impendit inspecta etiam diligenter carta prefati Stephani predecessoris nostri in qua continetur ipsum dicto monasterio Pontiniac ac viris religiosis in eodem Deo servientibus de ecclesia de Rumenal nomine beneficii quinquaginta marchas annuas intuitu Dei concessisse pariter et dedisse nos eadem caritate ducti adjunximus dedimus et concessimus fratribus memorati monasterii decem marchas annuas stellingorum bonorum et legalium ad pitantiam conventus in refectorio de eadem ecclesia de Rumenal nomine beneficii a quolibet rectore dicte ecclesie qui pro tempore fuerit sub pena amissionis beneficii sui perpetuo sine difficultate sibi in festo Nativitatis S Johannis Baptiste persolvendas ita plane quod si ipse rector in prefato termino a solutione dictarum X marcarum cessaverit et infra XL dies post statutum terminum de dampnis pariter et expensis quas dicti fratres occasione non facte solutionis incurrerint una cum solutione debita X marcarum non satisfecerit eisdem dictam penam incurrat Ad majorem etiam securitatem prefati monasterii vestigiis supradicti Stephani predecessoris nostri inherentes qui de L marcis in carta sua contentis eidem monasterio talem securitatem concessit providimus et statuimus ut quilibet rector in ecclesia de Rumenal successive instituendus in sua institutione vel postea cum requisitus fuerit a procuratore Pontiniac sollempniter juret coram domino archiepiscopo Cantuariensi vel ejus officiali si ipse archiepiscopus ageret extra regnum quod dictas X marchas in termino statuto procuratori Pontiniacensi persolvet sub pena superius memorata Ut autem hec nostra donatio perpetuam obtineat firmitatem eam presenti scripto sigilli nostri appositione munito duximus roborandam Actum anno Domini MCCXXX octavo