Charter Document - 02360443
| Charter Number: | 02360443 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Lay |
| Charter Type(s): | Arbitration |
| Date: | 1238 |
| Date type: | Internal, A.D. |
| Resource Link(s): |
|
Charter:
Omnibus presentes litteras inspecturis Guido comes Nivern et Forensis et Mathildis comitissa Nivern et Forensis salutem in Domino Noveritis quod cum causa verteretur coram nobis inter viros venerabiles et religiosos abbatem et conventum Pontiniac ex una parte et totam universitatem Legniaci Sicci castri nostri et alios tam clericos quam laycos et etiam viros religiosos ex altera super eo quod omnes predicti petebant a dictis abbate et conventu Pontiniac usuarium in nemoribus eorumdem Pontiniac que vulgariter appellantur nemus S Stephani sive Fay Vallis Pagana et Revisiacum et super eo quod ipsi petebant a dictis Pontiniac viam per grangiam eorumdem que appellatur Sancta Porcharia que omnia et singula predicti abbas et conventus eisdem penitus denegabant dicentes illos nullum habere usuarium in dictis nemoribus nec aliquod aliud jus tam in dictis nemoribus quam in via memorata preterquam ipsos Pontiniac ad que probanda dicti Pontiniac cartam bone memorie Guillelmi quondam comitis Nivern predecessoris nostri coram nobis induxerunt Tandem nos visa carta et diligenter inspecta auditis rationibus adverse partis et diligenter intellectis quas proposuerunt contra cartam supradictam habito diligenti curie nostre consilio juris ordine in omnibus observato cartam predictam in omnibus et singulis approbantes et confirmantes diffiniendo sententiavimus predictos universitatem et alios nullum habere usuarium in dictis nemoribus nec aliquod aliud jus tam in dictis nemoribus quam in via memorata et omnia predicta et singula esse dictorum Pontiniac libera et quieta dictos Pontiniac ab impetitione dicte universitatis et aliorum absolventes et eisdem super premissis perpetuum silencium imponentes cui nostre sentencie utraque pars acquievit Prefati vero fratres dederunt et concesserunt ad preces nostras et instantiam toti universitati de Legniaco castro nostro et aliis tam clericis quam laycis usuarium in dictis nemoribus reclamantibus medietatem nemoris sui quod appellatur nemus S Stephani sive Fay salvo pasturagio sicut consueverunt dicte partes Nos vero considerantes devotionem quam dicti fratres erga nos habent et habuerunt et eciam ob remedium animarum nostrarum dedimus et concessimus dictis fratribus propria et spontanea voluntate nemus nostrum situm versus Solliacum inter nemus vicecomitis Legniaci et nemus dictorum Pontiniac in perpetuum habendum et possidendum libere et quiete sine contradictione nostra et heredum nostrorum ita quod de cetero de predicto nemore facient voluntatem suam sicut de suo proprio Actum anno Domini MCC tricesimo octavo