Charter Document - 02360425

Ego Guido comes Nivernensis et Forensis et Mathildis comitissa uxor sua notum facimus universis presentibus et futuris quod nos dilectis burgensibus nostris de Vermentone et omnibus illis qui in dictam villam in nostra justicia vel in nostro dominio venerint moraturi dedimus imperpetuum et concessimus libertatem ad usus et consuetudines Lorriaci talem videlicet quod quilibet burgensis noster dicte libertatis tenens focum et locum sex denarios monete ibidem currentis annuatim ad festum Sancti Remigii de festagio nobis reddet ibidem Nullus hominum dicte libertatis consuetudinem aliquam reddat de nutritura sua nec de blado suo quod de vineis suis habuerit foragium reddat Nullus eorum in exercitum vel chevauchiam eat nisi eadem die ad domum suam si voluerit reveniat Nullus eorum possessionem habens aliquid ex ea perdet pro quocumque forefacto nisi adversus nos vel aliquem de hospitibus nostris forisfecerit De excasuris ita erit quod ad propinquiorem devenient heredem Volumus eciam et concedimus ut mercatum nostrum quod solebat esse apud Betriacum castrum nostrum die jovis cujuslibet septimam sit amodo imperpetuum similiter die jovis apud Vermentonem apud justiciam nostram sub tali consuetudine et libertate sub qua erat apud Betriacum Nullus ad mercatum Vermentonis veniens sive rediens capiatur sive disturbetur nisi die ipsa forisfactum fecerit Nullus in die mercati Vermentonis vadium sui plegii capiat nisi die consimili plegiacio illa facta fuerit Forisfactum de sexaginta solidis ad quinque solidos et forisfactum de quinque solidos ad duodecim denarios veniant et clamor prepositi ad quatuor denarios Nullum eciam dicte libertatis extra Vermentonem causa placitandi trahemus Nos vero nec aliquis alius pro nobis tailliam nec oblacionem neque rogam habitantibus dicte libertatis faciemus apud Vermentonem Credenciam habebimus ad dies quindecim completos persolvendi Si quis vadium nostrum aut alterius habuerit non tenebit illud ultra octo dies nisi sponte Si autem aliquis dicte libertatis erga alium inimiciciam incurrerit absque libertatis infractura et clamore preposito non facto concordaverit nichil ob hoc nobis vel preposito nostro emendabit et si clamor inde factus fuerit licet illis concordare ex quo districtum persolverint si aliquis de aliquo clamorem fecerit et unus erga alium nullam fecerit emendacionem nichil pro hiis nobis vel preposito nostro emendabit Si aliquis alicui sacramentum facere deberuit ei licet condonare Si homines dicte libertatis vadia duelli temere dederint et prepositi assensu antequam tribuantur obsides concordaverint duos solidos et sex denarios uterque persolvet et si obsides dati fuerint septem solidos et sex denarios persolvet uterque Si de legitimis hominibus duellum factum fuerit obsides devicti centum et duodecim solidos persolverit Nullus eorum captus teneatur si plegium veniendi ad jus dare poterit Quislibet eorum res suas si vendere voluerit vendat et redditis vendicionis suis si ab illa recedere voluerit liber et quictus recedat nisi in villa forisfactum fecerit pro quo debeat retineri Quicumque in libertate Vermentonis anno et die manserit nullo clamore eum sequente et neque per nos sive per prepositum nostrum rectitudinem prohibuerit deinceps liber et quictus permaneat hoc excepto quod homines nostros tailliabiles de foris villam venientes in dicta libertate non poterunt retineri Nullus cum aliquo placitabit nisi causa rectitudinis exequende vel recipiende In furno nostro Vermentonis non eruut portatores consuetudine nec eciam excubie erunt in villa Quicumque in mercato Vermentonis aliquid emerit vel vendiderit et per oblivionem vendiciones sive minagium retinuerit post octo dies illud persolvat sine aliqua emenda si jurare poterit quod scienter non retinuisset Si aliquis hominum dicte libertatis accusatus de aliquo fuerit et teste comprobari non poterit contra probacionem impetentis per solam manum suam se deculpabit Nullus enim de eadem libertate de quocumque vendiderit vel emerit super septimanam et se quocumque emerit in die Jovis in mercato pro non suo aliquam consuetudinem dabit Insuper voluimus et statuimus quod Ballivus et Prepositus noster qui pro tempore erunt quociens in Bailliam illam positi fuerint jurabunt omnes istas libertates et consuetudines tenere firmiter et fideliter observare et prepositus noster qui pro tempore ibidem erit Bedellos suos per accordamentum predictorum hominum in dictam tenebitur ponere libertatem Et quoniam volumus ut premissa omnia perpetuam habeant firmitatem omnia supradicta super sacrosancta evangelia juravimus firmiter tenenda imperpetuum et fideliter observanda volentes heredes et successores nostros ad hoc similiter obligari Quod ut ratum sit et firmum presentes litteras fecimus sigillorum nostrorum munimine roborari Actum apud Vermentonem anno Domini millesimo ducentesimo tricesimo quinto mense Julio die martis post Festum Beate Marie Magdalene