Charter Document - 02360391

Gie Tiebauz de Chanpaigne et de Brie cuens palazin fais à savoir à tos celx qui sont et qui seront qui cez letres verront que ge franchis et quit toz mes homes et mes fames de Saint Florentin de totes toutes et de totes tailles et est à savoir que la mainmorte que ge avoie et prenoie en mes homes et en mes fames de Saint Florentin ge la quit à aus et à leurs oirs à tojorz et autresinc à toz cax et totes celes qui venront ester en la comuneté de Saint Florentin par tel manière que ge aurai en toz cax en cui ge avoie taille et en toz cax qui de fors venront ester en la comuneté de Saint Florentin sis deniers de la livre do mueble fors qu'en armeures et en robes faites à eux lor cors et fors qu'en aaisement d'ostelz et est à savoir que vaissel où l'en met le vin et tuit aaisement d'or et d'argent seront prisié chascun an avec les autres muebles et si aurai de la livre de l'éritaige deus deniers chascun an et est à savoir que se aucuns de mes hommes ou de mes fievez ou de mes gardes vienent por demorer en la comuneté de Saint Florentin li borois de Saint Florentin n'en porront aucun retenir se n'est par mon asant ou par ma volenté et s'il avenoit que aucuns hom ou aucune fame de mes viles ou de mes fievez ou de mes gardes venient ester en la comuneté de Saint Florentin et li hom ou la fame qui i venroit disoit que il ne fust de mes viles ou de mes fievez ou de mes gardes il seroit esclairié à ma volenté de retenir ou dou refuser et se ce lo refusoie il auroit de moi conduit il et les soes choses quinze jors plainièrement Et est à savoir que se aucuns de la communeté de Saint Florentin vuelt paier vint livres en l'an il sera quites do sairement et de la prise de cele année vers moi et si leur doing et otroi la prévosté et la jostise de Saint Florentin et de leur terres et de leur vignes qui sont ou finaige de Saint Florentin si come ge la tenoie au jor que ces lettres furent faites por soisante et doze livres de provenisiens qu'il me rendront chascun an à Pentecoste et est à savoir que li forfait des hommes et de fames de la communeté de Saint Florentin et de toz cauz qui sont ou seront estagier en la jostice de la communeté de Saint Florentin sont as borjois de Saint Florentin si come ge les solois avoir et tuit li forfait des gent estranges qui ne sont de la jostice et de la communeté de Saint Florentin sont as borjois de Saint Florentin jusqu'à vint sout et li seurplus iert mien [Et gie] retaing lo murtre lo rat et lo larron là où cez choses seront coneues et ataintes et si retaing le champion vaincu dont j'aurai m'amende as us et as costumes de Saint Florentin et si retaing la fause mesure de laquele j'aurai quarante souz et li borjois de Saint Florentin en auront vint souz et est à savoir que je retaing la jostise et la garde de mes églises et de mes chevaliers et de mes fieves et de mes veis en tel manière que se aucuns de cax de Saint Florentin ou de la jostice de la communeté de Saint Florentin forfaisoit à aucun de cet que je retaing c'est à savoir as clers ou as chevaliers ou à mes fievez ou à mes veis dont plainte venist à moi ge la drecevoie et l'amende seroit moie et sera jugiée l'amende as us et as costumes de Saint Florentin par lo maieur et par les jurez de Saint Florentin Et est à savoir que gie au autres de mes genz ellirons chacun an treze homes de la comuneté de Saint Florentin à bone foi et cile treze elliront l'un d'aus à maieur chascun an dedanz la quinzaine que ge les aurai nomez et s'il ne l'avoient elleu dedanz la quinzaine ge i elliroie l'un d'aus treze et cil treze homes jureront seur saint que ma droiture et cele de la communeté de Saint Florentin garderont et governeront la vile et les afaires de la vile à bone foi et ce que cil doze juré et li maires feront par bonne foi il n'en porront estre agoisoné mais se il faisoient jugement ou esgart qui ne fust soffisanz il seroit adrecie à mon esgart as us et as costumes de Saint Florentin sauf ce [qu'il ne] leur costeroit rien et n'en feroient point d'amende cil qui auroient fait lo jugement ou l'esgart et cil doze jurés et li maires leveront les deniers de chascun sis de niers de la livre do mueble si com il est dit devant et deus deniers de la livre de l'éritaige chascun an par lo sairement de cax qui ce devront Et se li maires et li doze juré ou une partie d'ax jusqu'à trois ou plus avoient sopceneus aucun de cez qui auront juré à rendre sis deniers de la livre do mueble et deus deniers de la livre de l'éritaige il lo porrient croistre selonc leur bonne conscience sauf ce que cil n'en fera point d'amende qui aura juré et cil denier seront paié chascun an à la feste Saint Andrieu et est à savoir que tuit cels de la comuneté de Saint Florentin pueent et porront veindre et acheter éritaiges et autres choses si com il ont fait devant et ont et auront [leur] franchises et leur usages si com il les ont [eu]es devant se aucun voloit plaidoier aucun de la comuneté de Saint Florentin par plait ou par autre manière ge ne le porroie tr[aher] fors de Saint Florentin se por ma propre querele ni estoit et cele querele seroit terminée as us et as costumes de Saint Florentin Gie aurai mon ost et ma chevauchie si come ge avoie avant fors tant que hom de soisante anz ou de plus n'iera pas mais s'il a lo pooir soffisant il i envoiera un home por lui selonc son pooir et se ge semoig ost ou chevauchiée en tans ne foire sera li changeor et li marchant qui serront en la foire embesoignié i porront envoier homes soffisanz por aus sanz amende et se aucuns défailloit de mon ost ou de ma chevauchiée cil qui défauroit lo m'amenderoit et si promet à bone foi que ge nes semondrai en ost ne en chevauchiée por aus agoisoner mais que por mon besoing et si voil que chevax à chevauchier ne armeures à cex de la comune de Saint Florentin ne soient prises por detes ne por pleges ne por autres omissions et se ge ou mes genz avons mestier de chevax ou de charretes de Saint Florentin il sera requis au maieur de Saint Florentin et cil lo fera avoir à loier là où il lo trovera et paiera lo loier des deniers de ma cense et se il mésavenoit de cheval il seroit renduz au resgart des doze jurés et do maieur des deniers de ma cense Et chascuns de la comuneté de Saint Florentin qui aura vaillant vint livres aura aubeleste en son ostel et quarriaus jusqua cinquante Et est à savoir que li borjois de Saint Florentin cuirront et mourront à mes forz et à mes molins à autel marchié com as autres et s'il avenoit que ge neusse assez fors et molins à Saint Florentin feront moudre et cuire au resgart des doze jurés et do maieur selonc ce qu'il covenra soffisament à mes forz et à mes molins Et quant ge aurai forz et molins tant come il leur covenra au resgart des doze jurés et do maieur il i cuiront tuit et mourront Et s'aucuns des treze elleuz estoit cheuz en plait ou en guerre ou en escomeniement por lo fait de la ville li doze juré et li maires qui après venront seront tenu à penre lo fais seur aus ausi com li doze juré et li maires qui estoient devant l'avient seur aus et ge ne porrai metre hors de ma main nule de ces choses Et est à savoir que se aucuns de la comuneté de Saint Florentin estoit arestez et priz en aucun leu por ma dete ge lo sui tenuz à délivrer lui et ses choses do mien et s'il estoit pris et arestez et por autre chose ge lo sui tenuz à aidier à délivrer à bone foi Et est à savoir que se aucuns de ces qui venront ester en la comuneté de Saint Florentin s'en voloit [retirer] il s'en iroit sauvement et franchement quant il vorroit et auroit conduit de moi quinze jors planièrement Et est à savoir que mi serjant qui sont à moi et cil qui ont mes chartres ou les chartres de mes ancesseurs seront en la communeté de Saint Florentin se il vuelent et se il ne lo vuelent il seront en ma main si come devant Et totes ces choses et totes ces covenances qui sont contenues en [ces] lettres ai ge juré à tenir por moi et por mes oirs à aus et à leurs oirs parmenablement Et por ce que ce soit ferme et estable aige fait ces lettres seeler de mon seel Ce fut fait en l'an de grâce mil et deus cenz et trante et un