Charter Document - 02360357

Venerabilibus patribus et dominis N decano P thesaurario totique capitulo Beati Martini Turonensis P cantor Briennonensis et canonicus Chablearum salutem et tocius obediencie cum reverencia famulatum Injunctum est mihi ex parte vestra ut die veneris ante festum apostolorum Philippi et Jacobi coram vobis compaream responsurus vobis ab ea que contra me duxeritis proponenda Unde plane intelligo quod inimicus homo falsitatis zizaniam super veritatis triticum seminavit verba mea falsitate composita proposuit coram vobis de me propter quod necesse habebam si potuissem ad vos personnaliter accedere auditurus que de me dicta sunt et veritatem omnimodam ostensurus Scilicet bene sciebat ille bonus homo qui citationem a vobis hujusmodi impetravit scilicet Petrus Venator serviens domini prepositi Chableiarum quod illa die interesse non poteram cum proximo precedente die mercurii scilicet in crastino Sancti Marci evangeliste coram judicibus delegatis a domino papa Pruvini et dominica proxima [] In vigilia jam dictorum apostolorum apud Corbolium coram delegatis a legato dies habeam urgentissimos mihi assignatos unum ad audiendam sententiam alterum pro quadam falsa sentencia in me lata sicut vobis per memorialia dierum Necnon porro vobis cum ad vos venire potero liquidius apparebit Quod possum tamen facio ad vos mitto meum clericum latorem presencium eundem procuratorem meum constituens licet simplicem licet rudem quantum ad hanc diem ut que vobis dicta sunt de me tanquam contra vos dicta vel facta loco mei audiat et scripta recipiat et ad deliberandum diem velitis per vestras litteras assignare qua dominus decanus et alii magni domini valeant interesse ad quam diem submoneatis predictum Petrum si placet ut me presente ostendat que dicit aut meam innocentiam videatis et illum ex nobis vestra justicia puniat quem invenerit inculpatum Datum in vigilia Sancti Georgii anno Domini MCC vicesimo octavo