Charter Document - 02360352

Nos Johannes archidiaconus Eduensis et B decanus Sedilocensis notum facimus universis presentes litteras inspecturis quod cum inter capitulum Avalon ex una parte et nobilem virum Hugonem Bisortum dominum de Chasuil ex altera esset controversia super usagiis et pasturis quos in nemoribus et territoriis ville de Sauz dictum capitulum homines suos de Villereto habere dicebat per totum finagium dicte ville de Sauz et dictus Bisortus penitus id inficiaretur tandem in nos super dicta controversia compromiserunt in hunc modum quod nos de plano et bona fide super utriusque partis jure veritate inquisita dictam controversiam amicabili compositione vel juditio terminaremus Obligaverunt vero se partes in manu nostra ad penam centum librarum Divion solvendarum parti servanti arbitrium ab illa parte que ab arbitrio nostro resiliret Nos vero super hiis habito diligenti tractatu et bonorum virorum et discretorum usi consilio utriusque partis utililati diligenter et bona fide providentes ita pronunciavimus arbitrando quod dicta usagia et pasturas homines de Villereto pacifice de cetero possideant et quiete salvis dicto Bisorto et heredibus suis forestagio et corvadis que pro dictis usagio et pasturis dictus Bisordus ab hominibus de Villereto percipere consuevit Nos etiam attendentes quod occasione cujusdam nemoris ville de Villereto adjacentis homines Bisorti hominibus de Villereto multas molestias inferebant rogavimus dictum Bisortum ut dictum nemus pro bono pacis ecclesie Avalon in perpetuam elemosinam concederet et quitaret Ipse vero precibus nostris in hac parte acquiescens dictum nemus dicte ecclesie liberaliter concessit et quiete quod nemus dicto Bisorto jure hereditario pertinebat Et hec omnia videlicet tam usagia quam pasturas et nemus predicta dictus Bisortus tenetur ecclesie Avalon garantire quod si non faceret ad arbitrium nostrum tenetur emendare Nos eciam in dictarum rerum recompensationem pronunciavimus quod sepe dictus Bisortus et heredes sui quicquid ecclesia Avalon habet in villa de Seilliaco tam in nemoribus quam pratis terris hominibus et aliis in perpetuum habeant et possideant et ista omnia capitulum Avalon tenetur dicto Bisorto et heredibus ejus usque ad jus garantire quod si non faceret ad arbitrium nostrum teneretur emendare Et hec omnia de consensu utriusque partis et voluntate a nobis sunt pronuntiata Omnia vero predicta Agnes uxor dicti Bisorti et Guido et Galterus filii eorum laudaverunt et concesserunt In cujus rei testimonium ad preces partium presentem paginam sigillis propriis roboravimus Actum anno Gracie millesimo ducentesimo vicesimoseptimo mense novembri