Charter Document - 02360342

Cum tempore bone memorie Godefridi Lingonensis episcopi quedam controversia verteretur inter ecclesiam Reomaensem ex una parte et ecclesiam Beate Marie Rubeimontis ex altera super jure parochiali ecclesie Asiaci ut in charta ejusdem episcopi apparet dictus episcopus qui judex ordinarius utriusque ecclesie erat finem dicte discordie imponere volens partes suas interposuit ad pacem inter dictas ecclesias reformandam de assensu et laude utriusque partis secundum quod jus et equitas exigebat et pacem illam ad memoriam futurorum in quandam chartam redegit et ad majus robur eandem sigillo suo ut judex ordinarius roboravit Sed quia in eadem charta aliqua videntur aliquibus obscura de novo alia est orta controversia super premissis unde in nos communi assensu et voluntate utraque pars compromisit ad tollendam et declarandam dicte charte obscuritatem concedentes sub pena quinquaginta librarum quod dictum nostrum super hoc decreto firmiter observabunt Nos itaque diligenter inspecto prime charte capitulo scilicet quod omnes homines de castro et burgo et de tota parochia ad ecclesiam Asiaci bis in anno scilicet in festo Sancti Germani et in festo Omnium Sanctorum cum debitis oblationibus generaliter conveniant ipsum in primis declarare curavimus Quia quidam dicebant quod in aliis diebus nisi in diebus prenominatis secundum charte tenorem dicti homines tenebantur venire ad ecclesiam Asiaci aliis contrarium dicentibus et sentientibus nos itaque hanc obscuritatem declarando dicimus quod de communi jure et consuetudine in partibus istis hactenus approbata dicti homines tenentur venire ad ecclesiam suam parochialem Asiaci dominicis diebus et festivis et aliis secundum quod opportunitas eis permiserit Sed non dicimus cum debitis oblationibus quia in illis diebus non fiunt debite oblationes sed voluntarie Tenentur venire ibi ad audiendum verbum salutare et precepta ecclesiastica et que sunt festivitates feriales omnibus et que feriales feminabus non hominibus et alia corporibus et animabus utilia et ad sciendum qui sunt excommunicati nominatim ut eos tanquam excommunicatos evitare possint ne sententie in ipsos late participes fiant Et cum omnia parochialia jura jussione dicti episcopi ecclesie Asiaci collata sint de confessionibus reconciliationibus puerperarum nuptiarum judiciorumque benedictionibus cum nulla indigeant declaratione dicimus ut sic observetur sicut continetur in charta dicti episcopi De cereo benedicto et chrismate sicut distincte in synodo precipitur presbyteris dicimus ut sint in diligenti custodia presbyteri Asiaci ne de illis possint fieri sortilegia vel alia maleficia De infantibus baptizandis dicimus ut sicut definitum est a predicto episcopo de cetero firmiter observetur Et si necessitas tanta sit quod presbyter Asiaci non possit tempestive venire baptisetur ab aliquo alio clerico vel laico in ecclesia vel extra secundum quod necessitas poposcerit Dicit dictus episcopus in charta sua super hoc confecta quod omnes defuncti ad ecclesiam Asiaci sepeliantur nullo excepto nisi iis qui premisso jure parochiali ad ecclesiam Beate Marie sepeliri voluerint Unde dicimus quod de illis qui pervenerunt ad legitimam etatem tantummodo intelligendum est et non de illis parvulis qui non habent discretionem et velle nec possunt eligere sepulturam cum charta dicat de iis qui voluerint et non de quolibet alio Et quia in articulo illo qui dicit premisso jure parochiali reddantur conventui Beate Marie videntur aliqui dubitare quale jus ecclesia Asiaci debet habere in illis parochianis suis nos ita dignum ducimus declarare Jus parochiale tale est de jure communi et consuetudine approbata quod in primis debet facere infirmus testamentum presbytero suo et ecclesie sue postea quibus voluerit mortuus debet primo deferri ad ecclesiam Asiaci parochialem et ibi missa pro defuncto celebrari postmodum vero presbyter Asiaci debet reddere corpus defuncti conventui ecclesie Beate Marie Rubeimontis ordine servato hinc inde qui continetur in charta dicti episcopi super hoc confecta dicunt aliqui quod pueri infra legitimos annos constituti debent sepeliri apud Rubeimontem si patres eorum eisdem ibi elegerint sepulturam dicentes eos hoc jure usos fuisse per quadraginta annos et amplius Hoc etiam dicunt de confessionibus et ponunt causam eo quod non audent accedere ad ecclesiam Asiaci propter guerrarum pericula Sed nos dicimus in his duobus articulis homines Rubeimontis nullam acquisivisse prescriptionem quia si quando homines predicti non sunt ausi accedere ad ecclesiam Asiaci ad confitendum peccata sua propter guerras ut superius dictum est dicimus quod cessante causa cessat effectus quia modo non sunt ibi tales guerre De sepulturis puerorum dicimus quod ipsi vel patres eorum per hoc nullam acquisierunt prescriptionem cum presbyter Asiaci nullum faciens prejudicium ecclesie sue vel successoribus suis et pueros et adultos possit sepelire in quibuslibet cemeteriis pro voluntate sua de assensu tamen parentum et amicorum quia delictum persone non redundat in detrimentum ecclesie unde per hoc nulla alicui potuit acquiri prescriptio maxime cum ipsa semper debeat habere justum titulum et bonam fidem quod dicti homines habere non potuerunt scientes quod omnia jura parochialia tam castri quam burgi pertineant ad ecclesiam Asiaci sicut continetur in charta super hoc confecta De expensis vero in lite factis hic nihil et de chatex nihil modo definimus quia chatex nondum sunt probata nec expense jurate vel taxate sed potestatem penes nos retinemus de dicendo pro voluntate nostra super his tempore opportuno Ego Arnulfus abbas S Petri Autissiodorensis huic dicto meo super premissis coram partibus et pluribus aliis probis viris solemniter prolato ad petitionem partium et ad memoriam futurorum sigillum nostrum apponere dignum duximus Actum anno Domini millesimo ducentesimo vigesimosexto mense octobri die martis proxima post festivitatem Beati Remigii