Charter Document - 02360336
| Charter Number: | 02360336 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Lay |
| Charter Type(s): | Confirmation |
| Date: | 1226 |
| Date type: | Internal, A.D. |
| Resource Link(s): |
|
Charter:
Ego Droco de Meloto dominus Lochiarum et de Sancto Mauricio notum fieri volo tam presentibus quam futuris quod dominus Droco de Meloto pater meus et domina Hermengardis mater mea dederunt Deo et Beate Marie et fratribus Grandimontis ordinis commorantibus apud Sanctum Mauricium pro salute animarum suarum quicquid habuerunt infra clausuram exteriorem eorundem fratrum dederunt etiam eisdem fratribus annuatim juxta Sanctum Mauricium reddendum unum modium annone in terciis de Aillant dimidium scilicet modii frumenti et tres sextarios siliginis et tres sextarios ordei Et si aliquo casu aliquid de hac summa in predictis terciis defecerit suppleatur de terciis Sancti Mauricii Item dederunt eisdem fratribus duos modios avene de prima que recipietur in granario suo de Sancto Mauricio cujuscumque redditus fuerit Item reddiderunt fratribus dictis quinque modios vini de salvamento de Aglini et dimidium summe olei Et hoc oleum ematur de redditu denariorum quos habuerunt in domibus de Agliniaco Ad Sanctum Priscum autem dederunt fratribus nominatis octo modios vini in cellario suo tempore vendemiarum annuatim percipiendos et sexaginta solidos in pullanis de Sancto Prisco pro vestimentis eorum et pro ceteris domus sue negociis Hec predicta dona voluerunt et preceperunt dictus dominus Droco pater meus et domina Hermengardis mater mea ut ab heredibus suis annuatim et imperpetuum fratribus memoratis libere pacifice et quiete redderentur Preterea dederunt fratribus nominatis duos homines sufficientes liberos et immunes ab omni consuetudine et servitio et exactione in dono perpetuo unum scilicet ad Sanctum Priscum et alium ad Sanctum Mauricium qui de negociis suis extrinsecis eis providebunt Item dederunt supradictis fratribus furnum de Sancto Mauricio et quicquid de furno exierit et usuarium de nemore suo quod ad furnum pertinet Si quis autem in his predictis donis fratribus supradictis injuriam fecerit rogaverunt dominum archiepiscopum Senonensem ut ea fratribus ecclesiastico jure deffendat et conservet et similiter dominum episcopum Autissiodorensem Ego vero dictus Droco dominus de Lochiis et de Sancto Mauricio attendens devotionem predicti domini Droconis de Merlo patris mei et jam dicte domine Hermengardis matris mee dedi et concessi pro mea meorumque salute Deo et Beate Marie et fratribus sepedictis quicquid habebam vel habere poteram tam ipsi quam heredes et successores mei juris consuetudinis vel domini vel justicie vel forestagii vel gruarie infra dictam clausuram exteriorem fratrum predictorum ita quod fratres prenominati poterunt facere de nemore et aliis omnibus que infra dictam clausuram habebunt quicquid inde facere voluerint libere pacifice et quiete scilicet vendere dare edificare essartere Preterea dedi et concessi fratribus sepedictis quicquid habebam vel habere poteram in molendinis de Boneu et de Pontareu juris vel dominii vel echoite Hec predicta dona ego Droco de Merloto dominus de Lochiis et de Sancto Mauricio dedi et concessi predictis fratribus Et ut rata et inviolata perpetuis temporibus ab heredibus et successoribus meis habeantur presentem paginam sigilli mei munimine feci roborari Actum anno ab incarnatione Domini millesimo ducentesimo vicesimo sexto mense aprilis