Charter Document - 02360335

Universis presentes litteras inspecturis frater Petrus dictus abbas et conventus humilis Pontiniacenses in Domino salutem Noverint universi quod cum questio verteretur inter nos ex una parte et fratres militie Templi de Coulors ex altera super usuario in nemore S Petri et pasturis in eodem nemore et in terris grangie nostre de Challiaco tandem mediantibus bonis viris amicabilis compositio intercessit in hunc modum scilicet quod predicti Templarii poterunt capere et adducere de nemore S Petri ad opus domus sue tantum de Turniaco unam quadrigatam solummodo singulis diebus ad duos equos videlicet nemus mortuum ad comburendum et vivum ad edificandum et ad faciendum cupas et dolia dicto loco tantum necessaria ita tamen quod si una die quadrigatam concessam non adduxerint ipsam in alia die recuperare non possint nec ipsam quadrigatam vel aliquam ejus partem vendere poterunt nec donare vel commutare vel alias quam predicto loco ducere Concessum est etiam a Pontiniacensibus quod animalia domorum Templi de Turniaco et de Luetel poterunt ire in pasturis finagii Challiaci usque ad terras arabiles Challiaci quas nec intrare nec transire poterunt et animalia Pontiniaci abstinebunt se a terris propriis de Luetel circa domum contigue adjacentibus ubi autem portiuncule terrarum de Luetel fuerint et ultra quantum pasturagium nostrum duraverit ibunt animalia nostra sine calumpnia salvo dampno sine emenda Similiter etiam si animalia nostra forte intrarent terras adjacentes domui de Luetel et dampnum facerent dampnum solveremus sine emenda eodem modo solverent dampnum sine emenda Templarii si animalia eorum intrarent terras arabiles Challiaci Si autem alterutrius partium animalia alterius partis terras prohibitas intrare contigerit introitus ille quantumcunque duraverit neutri parti poterit proficere ad aliquod jus possessionem vel prescriptionem acquirendam De porcis etiam usque ad trecentos de predicta domo tantum de Turniaco poterunt habere Templarii in prefato nemore S Petri omni tempore a semita tantum que ducit a grangia Challiaci usque ad grangiam de Burs versus Sormeriacum solvendo pro quolibet porco duos denarios cursalis monete illius patrie et si predictam semitam transierint solvent pro pasnagio quantum aliquis extraneus De grossis etiam animalibus tantum quadraginta et de portantibus lanam tantum trecenta poterunt habere Templarii In prefinita nemoris portione poterunt etiam animalia de Turniaco concessa aliquando pernoctare in domo de Luetel si necesse fuerit sine calumpnia Pro hac autem concessione a nobis Templariis facta promiserunt firmiter predicti Templarii quod nos non impedient vel vexabunt de cetero super nemore S Petri nec aliquid ultra id quod concessum est in ipso nemore poterunt reclamare immo sine aliqua contradictione ipsorum Templiariorum faciemus de predicto nemore et int pso nemore S Petri per omnia sicut de nostro proprio quicquid facere voluerimus tam in parte concessa pascendis animalibus quam in omni alia Nos [autem] pariter cum Templariis coram venerabilibus viris R abbate S Petri Vivi Senonensis A decano Senonensi et H cantore Trecensi renunciavimus omnibus litteris tam apostolicis quam aliis et omnibus instrumentis super eodem negotio quandocunque et a quocunque confectis Quod ut ratum et firmum permaneat in futurum presentes litteras sigilli nostri munimine roboravimus Actum anno Gratie MCCXXVI