Charter Document - 02360316

Ego Theobaldus Campanie et Brie comes palatinus notum facio universis presentes litteras inspecturis quod dilecti mei R abbas et conventus Sancti Germani Autissiod me et heredes meos associaverunt ad medietatem propter villam novam faciendam in toto finagio tam in bosco quam in plano sito a rivo de Flooniaco usque ad rivum de Parriciaco et a ripa de Ermencon usque ad boscum Sancti Germani et in toto dicto bosco cum novalibus ejusdem bosci usque ad ripam Ermencie et a foresta domini Dodonis de Flooniaco militis usque ad forestam domini Roberti de Mainiaco militis et monachorum Deiloci et eciam in justicia quam ibi habent Ita quod in omnibus reditibus justiciis foresfactis serviciis sive ex mera liberalitate donantis sive ex quacumque causa factis et in omnibus proventibus quocumque modo proveniant medietatem habebunt et ego similiter medietatem habebo Concessum eciam fuit quod si ipsi vellent in dicto finagio mansionem facere eam liberam haberent et ego et heredes mei nostram si ibidem vellemus facere mansionem Illud autem sibi specialiter retinuerunt quod non liceat mihi in fluvio de Ermencon a ponte de Flooniaco usque ad molendina de Parriciaco molendina habere Ipsi autem id bene poterunt facere quecunque voluerint et de terra et de ripa tantum sibi appropriare ad opus molendinorum que ibi facerent et ad domum juxta molendina faciendam esset necessarium Ipsis eciam licebit molendinum suum quod est ab altera parte ripe in alteram ripam transferre Prepositum vero suum in eadem villa qualem voluerint et quando voluerint ponent et ego et heredes mei nostrum similiter ponemus Prepositus siquidem meus antequam de ballia se intromittat juramentum publice prestabit apud Sanctum Florentinum coram abbate vel priore ejusdem loci quod jus eorum in omnibus rebus pertinentibus ad dictam villam et ad finagium ejusdem ville pro posse suo servabit et ipsis vel eorum mandato reddet Quod si idem prepositus antequam juramentum prestiterit de ballia se intromitteret ipsis teneretur ad emendam Prepositus vero eorum eodem modo fidelitatem michi et heredibus meis prestabit vel nostro mandato Unus autem prepositorum sine altero non poterit placitare nec forefacta levare Partem eciam forefactorum ipsorum vel aliorum reddituum nec ego nec prepositi poterimus remittere nec ipsi remittere poterunt partem meam Preterea dictum fuit et concessum quod ego vel heredes mei non poterimus villam istam novam sine consensu ipsorum dirimere nec homines ecclesie ipsorum vel prioratuum in eadem villa poterunt retineri dumtamen testimonio duorum vel trium testium quod sint homines ecclesie ipsorum infra annum et diem probatum fuerit et perceptum Quicquid autem ego vel heredes mei in predicta potestate acquisierimus commune erit inter nos et abbatem et conventum Si autem ipsi aliquid acquirerent in eadem potestate commune similiter remaneret tali videlicet modo quod in eis que per empcionem ego vel heredes mei acquireremus abbas et conventus medietatem precii nobis tenerentur vel terram ad valenciam precii quod poneremus in predicto adquiramento infra tres leugas a dicta villa Et nos eis si aliquid per empeionem acquirerent simili modo reddere teneremur Preterea ego vel heredes mei de omnibus hiis supradictis associatis et acquisitis aliquid alienare vel extra manum nostram ponere seu alicui ecclesie in elemosinam conferre non poterimus nisi ecclesie memorate Dicti autem abbas et conventus concesserunt michi sine parte eorum exercitum et chevacheiam hominum dicte nove ville et de finagio ejusdem ville sicut in carta mea quam dicti homines penes se habent super hoc confectam plenius continetur Quod ut notum permaneat et firmum teneatur litteris annotatum sigilli mei munimine roboravi Actum anno Gratie MCC vicesimo quarto mense septembri