Charter Document - 02360241
| Charter Number: | 02360241 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Religious |
| Charter Type(s): | Concession |
| Date: | 1220 |
| Date type: | Internal, A.D. |
| Resource Link(s): |
|
Charter:
A Sti Petri dictus abbas totumque capitulum ejusdem ecclesie omnibus presentes litteras inspecturis salutem in Domino Universitati vestre presentibus litteris notum facimus quod cum ecclesia nostra in quibusdam decimis de territoriis in parrochiis Sancti Amatoris et Sancti Juliani sitis octavam partem solummodo perciperet et dilecti in Christo canonici Sancti Amatoris residuam partem haberent integre considerantes quod non cum minori labore et sumptu reciperemus partem nostram quam si dicte decime ad nos in integrum pervenirent dicti vero canonici Sancti Amatoris in recipiendo totum non majorem penam vel expensas facere debeant quam solerent cum suam solummodo reciperent portionem pensata tam in hiis quam in aliis utilitate utriusque ecclesie de consilio bonorum virorum et voluntate et assensu venerabilis patris Henrici Autissiodorensis episcopi octavam partem nostram predictarum decimarum dilectis in Christo priori et canonicis Sancti Amatoris dedimus et concessimus in perpetuum sub annua pensione viginti quinque solidorum Autissiodorensium duobus terminis nobis solvendorum videlicet infra octavas Nativitatis Domini tredecim solidos reliquos vero duodecim solidos infra octavas Pasche subsequentis Territoria autem de quibus decime percipiuntur sunt hec territoria de Valle Bosonis et de Bofaut et de Nuillet et de Monte Albo et de Campo Cardonis in censu Girardi Balene constituta et territoria de Pancevelle et de Monte Albo in censu domine Eustachie similiter constituta Ut autem hec adsentatio a nobis facta bona fide rata et inconcussa futuris temporibus permaneat presentes litteras sigillo nostro sigillari fecimus dictis canonicis Sancti Amatoris in ipsius rei testimonium et munimen Actum anno Domini millesimo ducentesimo vicesimo