Charter Document - 02360199
| Charter Number: | 02360199 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1218 |
| Date type: | Internal, A.D. |
| Resource Link(s): |
|
Charter:
Ego Eustachia comitissa Sacricesariensis notum facio presentes litteras inspecturis quod nobilis vir Willelmus Sacricesariensis maritus meus arripiens iter ad subsidium Terre Sancte cum domino Petro germano meo tunc comite Autissiodorensi nunc autem imperatore Constantinopolitano illustri precepit mihi et duobus fidelibus suis Petro de Campovalone et Symoni de Erableto militibus ut assignaremus decem libras provinienses annui redditus alicui loco religioso annuatim persolvendas prout videremus expedire saluti animarum ipsius Willelmi comitis et antecessorum suorum ita quod quicunque tenuerit minagium et teloneum de Firmitate Luparia in perpetuum medietatem hujus elemosine solvat in octabis Nativitatis Sancti Johannis Baptiste et alteram medietatem in octabis Omnium Sanctorum annuatim Nos autem ego videlicet E comitissa et dicti duo milites ex parte dicti Willelmi comitis assignamus prioratui Beati Stephani de Senonio redditum memoratum hoc modo quod quicumque tenuerit dictum minagium et teloneum de Firmitate tenebitur solvere priori et monachis dicti prioratus decem libras pruvinienses singulis annis in perpetuum terminis memoratis Et si defectus fuerit in qualibet istarum solutionum ipse qui tenebitur solvere dictam elemosinam de reditibus et proventibus ipsius minagii et telonei tenebitur nichilominus cum ipsis decem libris solvere de suo ipsi priori et monachis de Senonio universa dampna et expensas que provenerint ex ipso defectu solutionis Et quicumque fuerit dominus ipsius castri de Firmitate tenebitur esse fidelis adjutor ipsorum prioris et monachorum ad habendum libere totum illum redditum cum dampnis et expensis factis propter defectum solutionis Quoniam igitur volo quod elemosina memorata quam ego et dicti duo milites de consilio bonorum virorum et de mandato domini W comitis Sacricesariensis assignamus sepe dicto monasterio perpetuum robur obtineat presentem paginam sigillo duxi proprio confirmandam anno Gratie MCC octavodecimo