Charter Document - 02360134

In nomine Patris et Filii et Spiritus Sancti amen Nos videlicet Eustachius sacrista Philippus archipresbiter Autissiodori Narjotus Raphardi et Guido frater ejus milites super dissentionibus de usuario nemoris de Froisneto que inter capitulum Autissiodorense ex una parte Milonem de Arranto et Renaudum de Soolli milites pro se et hominibus suis emerserant ex altera arbitri sive dictores per compromissionem electi a partibus que et per juramenta militum firmata est et per penam quadraginta librarum utrinque vallata de qua pena pro capitulo fidejusserunt Stephanus Hastiarius et Stephanus Bataille de Parliaco pro Milone vero Willelmus Grossus et Renaudus de Soolli milites pro Renaudo autem Guido de Porta miles nos inquam quatuor arbitri inquisicione nostra juxta formam compromissi bona fide facta et omnibus rite actis secundum formam condictam formato pari assensu dicto nostro concordi sentencia prononciavimus hoc modo scilicet quod milites predicti Milo videlicet et Renaudus in nemoribus predictis ad usus suos vel domorum suarum nullum jus vel usuarium habent omnino Homines vero sui habent usuarium in eis ad pasturam ad fulcheriam et ad radices arborum mortuas quas vulgo ceuchias appellamus Preterea habent ibi usuarium sed tantummodo in vigilia Nativitatis Domini ad brenchias arborum ita quod nec arbores cedere nec excoronare nec brenchias abscondere nec eas ducere vel portare possunt nisi ad proprias mansiones suas et propter hoc usuarium solvere tenentur annuatim ecclesie Autissiodorensi consuetudinem constitutam Ex ejusdem quoque arbitrii seu dicti sentencia decernimus quod milites supradicti vel homines eorum prohibere non possunt vel impedire capitulum quin de nemoribus prefatis vendat extirpet et ad extirpandum dare possit de terris quoque ad excolendum vel ad herbergandum quod voluerit dummodo predictum usuarium posset hominibus remanere salvum in residuo cum usque ad hec tempora canonici in loco illo suas prebendas percipientes id sine contradictione fecisse noscantur sicut inquisicione nostra est declaratum Hoc arbitrium sive dictum nostrum sicut presenti pagine annotatum est et presentium sigillorum munimine roboratum tam a militibus per juramenta sua quam ab utraque parte per penam compromissam inconcusse precipimus et inviolabiliter observari Insuper quia nos milites sigilla non habemus propria recordacione dicti nostri facta coram domino nostro Willelmo Autissiodorensi episcopo illud notificamus et protestamur eidem simul cum coarbitris predictis nostris in ejus presentia constituti ut inde litteras suas patentes conficiat ad munimen Actum mense decembri anno Domini MCC tercio decimo