Charter Document - 02360098

Frater Galterius Dei gratia abbas et Petrus prior Viziliacensis omnibus presentes litteras inspecturis salutem in Domino Noverit universitas vestra quod de controversia que vertebatur inter Gilonem priorem et monachos Beate Marie de Sinemuro ex una parte et Renaudum Boche burgensem nostrum ex altera super jure duarum villarum Vasseii scilicet et Varie per manum domini Hervei abbatis Flaviniacensis coram nobis compositio facta est hoc modo Quod Reinaudus guerpivit Deo et monachis Beate Marie de Sinemuro quicquid juris ipsi monachi in predictis duabus villis dicebant se habere Dedit etiam eis quicquid acquisierat vel acquisiturus erat ibidem feodum etiam quod habebat a duce ita quod si dux contrairet omnimodam diligentiam et penam ad illud dicte ecclesie acquirendum absque donatione rei proprie adhiberet Prior vero de voluntate abbatis sui concessit prefato Reinaudo et uxori sue Agneti villas jam dictas toto tempore vite sue pacifice possidendas quod si alterum eorum decedere contigerit dimidium bonorum de predictis villis mobilium et immobilium ad ecclesiam supradictam devolvetur exceptis domibus et ustensilibus earumdem Post decessum vero utriusque dicte ville cum omni integritate et jure suo ad supradictam ecclesiam devolventur ita etiam quod boves ad usum unius carruce sufficientes a predicto Reinaudo et uxore ejus Agneta ibidem monachis de Sinemuro remanebunt Tenentur autem pro hac concessione eis facta Reinaudus et uxor ejus Agnes ecclesie prenominate centum solidos divionensium in crastino festivitatis Sanctorum Innocentium singulis annis reddere censuales Post decessum vero unius eorum superstes dimidium censum reddere tenebitur Hanc compositionem ita factam se observaturos tam dictus prior Gilo quam Reinaudus promiserunt et observationem ejus in manu domini Hervei abbatis Flaviniensis se jurasse in nostra presentia sunt confessi Hanc compositionem laudaverunt Agnes uxor et filii ejusdem Reinaudi In hujus rei testimonium nos ad petitionem Reinaudi et Agnetis uxoris sue et heredum eorumdem dicto Giloni priori ecclesie sepe dicte presentes litteras tradidimus sigilli nostri munimine roboratas Ita quod abbas Viziliacensis si predicti Reinaudus Agnes uxor ejus vel heredes eorumdem a pretaxatis pactionibus quod absit resilirent in eos auctoritate qua fungitur excommunicationis sententiam usque ad condignam satisfactionem promulgare teneretur Actum anno incarnati Domini nostri Jhesu Christi millesimo ducentesimo decimo mense decembri tercio nonas ejusdem mensis