Charter Document - 02360081
| Charter Number: | 02360081 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Religious |
| Charter Type(s): | Arbitration |
| Date: | 1209 |
| Date type: | Internal, A.D. |
| Resource Link(s): |
|
Charter:
Willelmus Dei gracia Autissiod episcopus et Robertus Brocarz canonicus Senonensis procurator negociorum domini Senonensis omnibus presentes litteras inspecturis in Domino salutem Noverit universitas vestra quod cum diu fuisset controversia inter monachos Sancti Remigii Senonensis ex una parte et Garnerium de Pratis ex alia super hoc quod dictus G petebat quod in domo Dei de Posterna ab eodem edificata divina celebrarentur cimeterium construeretur et alia que ad divinum honorem et servitium domui Dei congruent ordinarentur in eadem monachis hoc contradicentibus occasione cujusdam indulgentie eis a domino papa concesse in qua ut asserebant continebatur quod nulli liceret infra fines parrochiarum suarum nisi de eorum assensu ecclesiam construere vel capellam Tandem communi assensu Furconis abbatis et conventus Beati Remigii tam ipsi monachi quam dictus G ordinationi nostre se supposuerunt et ad eandem firmiter observandam abbas et conventus per litteras suas patentes G vero per fide jussores idoneos se obligaverunt Nos itaque de consilio bonorum virorum qui nobiscum aderant ita duximus ordinandum quod capellanus sive capellani qui pro tempore ibidem fuerint sive conversi fuerint in eadem domo sive non fidelitatem facient presbitero Sancti Romani qui pro tempore fuerit cum super hoc fuerint requisiti quod parrochianos ejus non recipient ad confessionem neque eis ministrabunt eucharistiam nisi in articulo necessitatis nec eos etiam ad benedictionem nuptiarum recipient nec ad purificationem nisi mulieres ibidem jacentes nec in festibus annualibus nec ad alia jura parrochialia Instituimus etiam quod in illa domo non celebrabitur missa die dominico nec in festivitatibus annualibus nec in festivitatibus Beate Marie vel apostolorum antequam pulsetur ad primam in majori ecclesia nisi forte aliquis transiens vel volens missam privatam audire aliqua necessitate imminente missam petierit et tunc licebit ibi missam private celebrari In aliis diebus quandocumque celebrare voluerint celebrabunt Non erit ibi religio nisi que solet esse in aliis Domibus Dei Si vero super aliquo mota fuerit questio de cetero quod nostre non occurrerit memorie illud de assensu partium discretioni domini archiepiscopi relinquimus terminandum In cujus rei memoria kartam hanc sigillorum nostrorum muniri fecimus firmamento Actum anno Gracie MCC nono mense Julio