Charter Document - 02360063
| Charter Number: | 02360063 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1207 |
| Date type: | Internal, A.D. |
| Resource Link(s): |
|
Charter:
Petrus Dei gracia Senon archiepiscopus omnibus tam presentibus quam futuris ad quos littere presentes pervenerint in Domino salutem Noverit universitas nostra quod nobilis vir Milo de Pogiaco et Helisabeth uxor sua in presentia nostra constituti in perpetuum dederunt elemosinam pauperibus domus Dei que sita est ante ecclesiam Beati Stephani omnes antiquas decimas quas ipsi percipere solebant in territorio de Sancto Valeriano de Foscheriis et de Subtrasia et quicquid dominii in eis habebant exceptis decimis agriculture sue de territorio de Villa Chavan et exceptis decimis de Praella Et de eisdem decimis quas dicte domui Dei dederunt in manu nostra se devestierunt et nos de eorum assensu et voluntate magistrum ipsius domus Dei de eis investivimus Dederunt preterea predicti Milo et Helisabeth omnibus ovibus ejusdem domus Dei perpetuum usuarium pasture totius terre sue tam in nemoribus quam in plano prout aliis animalibus datum fuerit ad pasturam Hanc elemosinam laudaverunt liberi eorum Andreas et Agnes ceteris liberis eorumdem videlicet Guidone et Oda in etate adeo tenera constitutis quod nondum habebant usum loquendi Laudaverunt etiam eandem elemosinam dominus Gaucherus de Jovigniaco et Domina Aelicia de Venesiaco uxor ejus et dominus Erardus de Brena ipsius Aelicie filius de quorum feodo predicte decime movebant Prefatus vero Milo quia intuitu donationis predictorum decimarum de elemosinis memorate domus Dei habuit mille libras parisienses fide interposita firmavit se rectam garantiam portaturum et inde plegios obligavit dominum Garnerium et dominum Ansellum de Triangulo dominum Buchardum de Vandopera et Gilonem de Flagiaco militem Quod ut perpetue stabilitatis robur obtineat presentem cartam sigilli nostri munimine fecimus roborari Actum mense augusto anno Gracie millesimo ducentesimo septimo