Charter Document - 02360043

P Dei gratia Senonensis archiepiscopus omnibus presentes litteras inspecturis in Domino salutem Universitati vestre notum fieri volumus quod mandatum apostolicum suscepimus in hac forma Innocencius episcopus servus servorum Dei venerabili fratri [] archiepiscopo Senonensi salutem et apostolicam benedictionem Ad nostram noveris audientiam pervenisse quod cum inter dilectos filios clericos chori ecclesie Senonensis ex una parte ac nobilem virum G de Leves et uxorem ipsius Carnotensis diocesis ex altera super redditu sexaginta solidorum Parisiensis monete quos bone memorie R de Milliaco canonicus Senonensis eis annuatim percipiendos in pedagio de Capella legaverat coram dilectis filiis Sancti Petri et [] Sancti Johannis ac Sancte Columbe abbatibus questio verteretur duo illorum juxta formam mandati apostolici cum tercius interesse minime potuisset cognitis cause meritis predictum redditum adjudicaverunt per diffinitivam sententiam clericis ante dictis in corporalem possessionem inducentes eosdem et militem memoratum quia contumaciter resistebat excommunicationis vinculo innodantes Postmodum autem nos dilectis filiis decano et archidiacono Senonensis dedimus in mandatis ut predictam sententiam sicut erat justa per censuram ecclesiasticam appellatione postposita inviolabiliter facerent observari At ipse ad dilectos filios [] abbatem de Sarneio et prepositum de Auvers quasdam litteras impetravit a nobis tacita veritate auctoritate quarum ipsi dictam excommunicationis sententiam relaxarunt nulla satisfactione exhibita clericis sepefatis Ipsi ergo sui juris dispendium attendentes ad nostram presentiam suum nuncium destinarunt qui a nobis obtinuit venerabili fratri nostro episcopo et dilectis filiis decano et cantori Autisiodorensis demandari ut militem memoratum ad reddendum legatum clericis sepedictis inducerent et monerent et si necesse foret per censuram ecclesiasticam appellatione postposita compellere procurarent Quia igitur dictus miles ad eorum monitionem eisdem clericis satisfacere non curavit ipsi cum in priorem excommunicationis sententiam reduxerent miles autem in sua pertinatia perseverans ad dilectos filios abbatem Sancti Charauni subdecanum et H de Nose canonicum Carnotensis nostras litteras impetravit per quos sicut per priores ipsis clericis satisfactione aliqua non impensa fuit ab excommunicationis vinculo absolutus Quia igitur fraus et dolus nemini debet patrocinium impertiri fraternitati tue per apostolica scripta mandamus quatinus si res ita se habet nisi dictus miles ad ipsorum clericorum super his indebita molestatione desistat et de illata satisfactionem exhibeat competentem ipsum in sententiam pristinam sublato appellationis obstaculo reducere non omittas deffinitivam sententiam judicum predictorum sicut et justa faciens per eandem districtionem appellatione remota firmiter observari nullis litteris veritas et justicie prejudicantibus a sede apostolica impetratis Datum Rome apud Sanctum Petrum XI kalendas januarii pontificatus nostri anno septimo Cum igitur hujus auctoritate mandati ad diem sibi prefixum predicti clerici et procurater ipsius militis in nostra fuissent presentia constituti et nobis per ipsorum clericorum instrumenta plenarie fides facta fuisset rem ita esse sicut ab eis domino Papa fuerat intimatum et sicut continetur in ipsius narratione rescripti eundem militem quia de supradicto legato non satisfecerat nec satisfacere volebat clericis memoratis auctoritate jam dicta in priorem excommunicationis sententiam de prudentum virorum consilio retrusimus et ejus uxori et familie et hominibus sicut habet ecclesie consuetudo sacramentis ecclesiasticis interdictis terram ipsius supposuimus interdicto Actum Senonis anno gratie M ducentesimo quinto