Charter Document - 02360021

Ego Petrus comes Altisiodori et Tornodori notum facimus universis presentibus pariter et futuris quod quitavi abbati et monachis monasterii Cellensis et ecclesie Sancti Petri de Sanctis Virtutibus et hominibus ejusdem ville gistum meum et omnes antiquas consuetudines quas in eadem villa tam ego quam famuli mei quoquo modo habebamus tali quondam pacto quod in predicta villa ego et prior ejusdem ville habebimus annuatim in crastino Omnium Sanctorum de unoquoque foco ville predicte duos bichetos avene de quolibet vero pecore trahente aratrum duos solidos monete ejusdem patrie similiter erit de pecoribus forinsecorum hominum terram Sancti Petri colentibus Si forte eadem pecora in predicta villa decubabunt vel levabunt de quolibet etiam homine manibus suis terram colente XII denarios Si vero aliquis de predicta villa vel de colentibus terram ipsius ville istas consuetudines tenere non vellet prior dicte ville et ego terram eorum que de Sancto Petro movet in manu nostra caperemus Maior prioris immunis erit et liber ab ista et omni alia consuetudine Foris facta sexaginta solidorum venient ad quinque solidos que vero quinque solidorum erant venient ad duodecim denarios Prior vero poterit vendere boscum suum vel cuicumque dare voluerit quasi suum proprium ita tamen quod ego ex nullo modo contraire potero nec contradicere debebo Foris facta tamen tam boschorum quam planorum ego et prior dicte ville inter nos equa lance parciemus Istorum omnium prestito juramento judices erunt quatuor probi homines electi a communitate ville totius qui etiam singulis annis si mutandi fuerint vel aliquis eorum per me et per priorem mutabuntur Pecora que in pratis vel bladis seul aliis quibuslibet foris factis capta fuerint et foris factum notum fuerit si equus fuerit vel bos aut vaca seu porcus singula reddent quinque denarios ovis vero unum Si vero noctu vel ad factam custodiam predicta pecora in foris factum fuerint inventa ad judicium quatuor predictorum et ad consilium vel laudem prioris emendabuntur Ego in herbergio prioris vel in ambitu domorum suarum ubicumque fuerint seu in famulis domus sue nullam omnino justitiam habebo Quotiescumque enim quatuor prefati judices constituentur unus ex famulis meis cum priore intererit qui eorum juramenta accipiet quod jus prioris et meum legitime custodiet in dicta villa Nullam partem pro qualibet re habebo nec habere debebo vadiorum sive hominum captionem nec submonitionem nisi per priorem Quicquid in predicta villa habebo ex dono et permissione monasterii Cellensis me habere cognosco Murdra furtum et raptum per abbatem Cellensem et per me vel per nostrum mandatum judicabuntur quod si ego et abbas non potuerimus interesse per priorem et per mandatum meum judicabuntur Dicte ville justiciam et foris factum ego et prior inter nos parciemus Homines dicte ville debent michi decem libras in festo Sancti Remigii annuatim persolvendas per quas tota villa erga me remanet quitta a prandiis que in ea famuli mei habere solebant que decem libre mee sunt proprie Excasure hominum meorum mee erunt Excasure hominum Sancti Petri prioris sunt proprie Terragium decime molendina furni aque census et omnes dicte ville redditus quoquo modo in posterum provenierint hec omnia scilicet prioris sunt propria quitta et libera illi soli Redditus per medium partiuntur qui in crastino Omnium Sanctorum redduntur videlicet duo bicheta avene qui pro quolibet loco ville redduntur et duo solidos pro pecore trahente aratrum redditi et alii duo solidi pro pecore forinseci homines et duodecim denarii pro homine terram manibus suis colente sicut superius dictum est Similiter foris facta per medium dividuntur Hoc etiam cunctis notum facio quod nec ego nec quilibet alius in dicta villa molendinum vel furnum sive pressorium constituere potuerit nisi voluntate et assensu monachorum cellensium Si contingeret quod prefatam villam in alterius manum mitterem omnes prelibate consuetudines observarentur nec aliter possem de villa donum vel commutationem facere Ut autem hoc in posterum ratum habeatur et immotum ego et Yolendis comitissa uxor mea presentem cartulam sigillorum nostrorum munimine roboravimus Rogavimus etiam dominum et amicum nostrum venerabilem episcopum Lingonensem ut ad hujus rei confirmationem sigillum suum huic carte apponeret sub tali conditione quod si ego Petrus comes a predictis conventionibus in aliquo resilirem totam terram meam anathemati supponeret donec istud secundum carte mee tenorem emendaretur Actum anno incarnati Verbi MCCIII mense Julio