Charter Document - 02350468
| Charter Number: | 02350468 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1196 |
| Date type: | Internal, A.D. |
| Resource Link(s): |
|
Charter:
Michael Dei gratia Senonensis archiepiscopus omnibus ad quos littere iste pervenerint in Domino salutem Notum fieri volumus universis presentibus pariter et futuris quod constituta in presentia nostra dilecta in Christo filia Elisabeth quondam uxor Fulconis de Trana recognovit se vendidisse pro centum libris Parisiensis monete ecclesie Beate Colombe Senonensis terram quam habebat ante crucem Giraudi et pratum eidem terre contiguum et aliam terram suam que sita est inter crucem Giraudi et Sanctum Theobaldum De his autem centum libris dedit viginti quinque libras prenominate ecclesie in elemosinam dicta Elisabeth pro anniversario suo et anniversariis defuncti Fulconis viri sui et filie sue Eline et generi sui Stephani Roberelli annuatim in eadem ecclesia faciendis Dictam autem venditionem et ipsam elemosinam Elina filia sepe dicte Elisabeth et vir suus Stephanus Roberellus coram nobis venientes laudaverunt In cujus rei memoriam hanc kartam notari fecimus et sigilli nostri munimine roborari Actum Senonas anno incarnati Verbi millesimo centesimo nonagesimo sexto