Charter Document - 02350462
| Charter Number: | 02350462 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Religious |
| Charter Type(s): | Decree |
| Date: | 1196 |
| Date type: | Internal, A.D. |
| Resource Link(s): |
|
Charter:
Ego Hugo Dei gratia Autissiodorensis episcopus tam futuris quam presentibus notum fieri volumus inter ecclesiam Sancti Mariani et Bartholomeum capellanum de Baserna pro decima terrarum quas in parrochiatu ejusdem ville prefata ecclesia possidet diu habitam contentionem sed tali demum fine fuisse sopitam Consueverant fratres predicte ecclesie ex constituto quondam episcopi domni Hugonis Pontiniacensis annuatim capellanis de Baserna octo biches annone persolvere Quam taxationem cum prefatus B insufficientem contenderet addiderunt abbas et fratres supradicte ecclesie pro bono pacis alios quatuor biches Singulis igitur annis capellani de Baserna accipient in grangia sepe dicte ecclesie de Bosculo duodecim biches talis annone qualis terras illas afferre contigerit sex biches de frumento et sex de tremesio Hoc itaque modo predicta lite pacificata tenorem ipsius pacis ad peticionem utriusque partis sigilli nostri auctoritate muniri fecimus [Actum] anno dominice Incarnationis millesimo centesimo nonagesimo sexto