Charter Document - 02350442
| Charter Number: | 02350442 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Lay |
| Charter Type(s): | Confirmation |
| Date: | 1193 |
| Date type: | Internal, A.D. |
| Resource Link(s): |
|
Charter:
Ego Petrus comes Nivernensis notum esse volo tam futuris quam presentibus quod cum karissima conjux mea Agnes comitissa Nivernensis in extrema egritudine laboraret ultimam voluntatem suam et ordinationem testamenti sui super me reliquit rogans et obsecrans ut ecclesiis et locis religiosis pro remedio anime sue providerem Quocirca considerans ego et attendens devotionem et reverentiam quam decanus et canonici Beati Stephani Autissiodorensis circa sepulturam ipsius exibuisse dinoscuntur et quod singulis annis ejus anniversarium sollempniter et missam pro ea et pro cunctis fidelibus defunctis singulis diebus in perpetuum se celebraturos de mera liberalitate compromiserunt salvamentum quod in potestatibus de Porreno et de Chichiriaco habebamus tam in avena quam trossis panibus et denariis eis quitavimus ita quod homines earumdem potestatum in eadem libertate et immunitate ventarum et aliarum consuetudinum in foro Autisiodori et in tota terra comitatus Nivernensis permaneant in qua fuisse dinoscuntur quando nos vel predecessores nostri comites Nivernenses idem salvamentum accipere consueverunt et nos et successores nostri debitam protectionem consilium et auxilium nichilominus eis impendere differamus Quod ut ratum permaneat presentem paginam sigilli mei appositione roboravi Rogavi etiam dominum Autisiodorensem episcopum in cujus presentia hec et alie helemosine pro remedio anime prefate consortis mee ordinate sunt sigillum suum huic carte ad majorem confirmationem apponeret Actum Autisiodori anno dominice Incarnationis MCCXIII