Charter Document - 02350407
| Charter Number: | 02350407 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Lay |
| Charter Type(s): | Confirmation |
| Date: | 1190 |
| Date type: | Internal, A.D. |
| Resource Link(s): |
|
Charter:
Ego Willelmus comes Joviniaci notum esse volo omnibus Dei fidelibus tam futuris quam presentibus quod cum Jerosolymam essem iturus charissima amica mea Elvidis abbatissa S Juliani conquesta est mihi super quibusdam injuriis et exactionibus quas homines et servientes mei in terra sua de Miganna in boscis ad eam pertinentibus tempore meo fecerant contra jus et equitatem et compositionem que inter bone memorie Renardum patrem meum et Agnetem quondam abbatissam prefati monasterii S Juliani facta fuisse dinoscebatur Visa itaque et audita carta ipsius compositionis que Hugonis bone memorie Senonensis archiepiscopi et Renardi patris mei sigillis erat roborata quecumque in ea continebantur rata habui et ne quid deinceps contra tenorem predicte carte in villa de Miganna seu boscis vel villis ad ipsam pertinentibus fieret et firmiter promisi et hominibus et servientibus meis districte prohibui confessus et protestatus injuste et illicite factum fuisse si quid ego et homines mei contra tenorem predicte carte per negligentiam et necessitatem aliquam feceramus Quod ne de cetero fiat aut in consuetudinem trahatur presenti pagina sigilli mei appositione munita supernominatam cartam confirmo et ratam habeo sub periculo animarum prohibens ne quis heredum et hominum meorum contra hanc mee confirmationis paginam aliquo modo ire presumat Adjeci et quod in bosco de Bulelo quod situm est in territorio S Juliani abbatissa ad omnia necessaria sua absque ulla contradictione usuarium habet in alia parte ejusdem nemoris que non est in territorio S Juliani nihil habet Aie de Bussiaco que sunt in territorio S Juliani in custodia et justitia mea sunt sed non licet mihi eas dare vel vendere absque licentia abbatisse si autem extirparentur terra abbatisse esset Actum anno Incarnationis dominice MC nonagesimo