Charter Document - 02350325

In nomine sancte et individue Trinitatis amen Philippus Dei gratia Francorum rex Necessarium est ut beneficio litterarum acsi bene gestorum memoria perpetuetur ne illa qui a prioribus laudabiliter acta sunt a posteris quos ad mala perpetranda promptiores fore timemus perperam retractentur Noverint itaque universi presentes pariter et futuri quod dilectus et fidelis noster Guido archiepiscopus Senonensis suorum precavere volens incommoda subjectorum gravamina que vacante archiepiscopatu homines ejusdem archiepiscopatus sustinere consueverant patrem nostrum bone memorie regem Ludovicum humiliter postulavit ut ea justo moderamine temperaret Qui ad peticionem et preces ipsius de assensu nostro antequam in regem sublimaremur et familiarium suorum consilio concessit et statuit intuitu pietatis et devotionis quam ad Senonensem habebat ecclesiam ne de cetero quotiens archiepiscopatus vacaverit sive ipse sive successores sui reges Francie in tota terra prenominati archiepiscopatus talliam que summam sexaginta librarum excedat uno anno accipiant Tallia vero ista ad considerationem prepositi Senonensis regii et illius qui prepositus erit archiepiscopi constituetur et capietur Preterea voluit ne quis nisi de mandato suo et ad opus suum vel successorum suorum regum Francie in vivariis ejusdem archiepiscopatus quandiu pastore caruerit piscari presumat Nos vero patris nostri vestigiis inherentes id quod genitor noster bone devocionis concessit concedimus et ut perpetuam obtineat stabilitatem presentem paginam sigilli nostri auctoritate ac regii nominis caractere inferius annotato precipimus communiri Actum apud Fontem Blaaudi anno incarnati Verbi MC octogesimo tercio regni nostri anno quarto astantibus in palatio nostro quorum nomina supposita sunt et signa S comitis Theobaudi dapiferi nostri S Guidonis buticularii S Mathei camerarii S Radulphi constabularii Datum per manum Hugonis cancellarii