Charter Document - 02350254

Willelmus Dei gratia Senonensis archiepiscopus apostolice sedis legatus omnibus tam futuris quam presentibus in perpetuum Notum fieri volumus universitati vestre quod ad Senonensis ecclesie et pontificatus nostri augmentum novam in territorio de Rosson villam ad consuetudines Lorriaci instruximus hoc excepto quod quicumque in territorio illo domum habebit pro domo sua et pro arpenno terre duos solidos de asisa per annum dabit Omnes in parrochia manentes de consuetudine ad furnum et ad molendinum nostrum ibunt Nullus eorum ibit in expeditionem vel equitationem nisi eadem die ad domum suam si redire voluerit redeat et quicumque in villa possessionem suam habuerit nichil inde sibi auferetur nisi nobis vel hospitibus nostris forefecerit Nullus hominum de parrochia ipsius ville tonleium neque aliquam consuetudinem reddet de nutritura sua neque de annona sua quam de labore suo vel de labore animalium suorum habuerit minagium reddet neque de vino illo quod de vineis suis habuerit forragium solvet nec in terra nostra alicubi pedagium vel tonleium reddet Nullus ad ferias vel mercatum veniens vel rediens capietur vel disturbabitur nisi ipsa die forefecerit Nullus in die mercati vel ferie in villa vadium plegii sui capiet nisi die simili plegiatio illa facta fuerit Forefactum de sexaginta solidis ad quinque veniet et de quinque ad duodecim denarios et clamor prepositi ad quatuor denarios Nullus eorum nobiscum placitaturus a villa exibit nisi causa christianitatis nec nos nec alius pro nobis talliam neque rogam neque oblationem faciet in villa Nullus cum edicto vinum suum ibi vendet nobis exceptis qui nostrum proprium et quod in territorio crescet vendemus Nullus eorum servientibus nostris creditionem faciet nisi voluntate spontanea nobis tamen exceptis sed et nobis non credent nisi usque ad quindecim dies Si autem nostrum vel alterius vadium habuerint illud ultra octo dies nisi sponte tenebunt Si unus erga alium inimiciciam incurrerit absque ville infractura et clamore preposita non facto concordaverit nichil ab hoc nobis vel preposito nostro emendabit Si unus alii sacramentum debuerit condonare ei licebit et si illi homines vadia duelli stulte dederint et ex assensu prepositi antequam tribuantur obsides concordaverint duos solidos et sex denarios uterque persolvet et si obsides dati fuerint septem solidos et sex denarios Si vero unus de alio clamorem fecerit et nullam inde emendationem fecerit nil ob hoc nobis vel preposito nostro emendabit Si autem clamor ad prepositum factus fuerit licet illis concordare ex quo districtum persolverint Si autem de legitimis hominibus duellum factum fuerit obsides devicti centum et duodecim solidos persolvent Nullus etiam eorum corvatam nobis faciet nisi semel in anno ad vinum Senonis vel ad alia nobis necessaria adducenda faciant et cum illuc venerint a nobis non procurabuntur et illi hoc facient qui equos et quadrigas habent et submoniti fuerint Ad villam ligna ad culinam nostram cum in eadem villa fuerimus adducent Nullus eorum captus tenebitur qui plegium veniendi ad jus dare potuerit et quilibet eorum qui res suas vendere voluerit vendet et redditis venditionibus suis si a villa recedere voluerit liber et quietus recedet nisi forefactum fecerit Quicumque etiam in villa predicta uno anno et uno die permanebit nullo eum sequente et nullo de eo rectitudinem prohibente deinceps liber et quietus permanebit Nullus cum aliquo placitabit nisi causa rectitudinis exigende et recipiende In nuptiis preco nil pro consuetudine habebit neque excubitor Nullus agricola qui terram colit cum aratro non dabit plus quam unum minellum siliginis omnibus servientibus nostris quando messis erit In furnis non erunt portitores consuetudine In villa illa non sint excubie consuetudine Nullus hominum ipsius ville dabit demandationem preposito Quicumque in mercato ejusdem ville emerit aliquid vel vendiderit et per oblivionem tonleium retinuerit post dies octo illud sine causa reddet si jurare poterit quod scienter illud non retinuerit et si aliquis eorum super aliquo accusatus fuerit quod per idoneos testes probari non poterit contra probationem impetentis sola manu se licebit purgare Quod si aliquis illorum in villa illa aliquid insuper septimana vel emerit vel vendiderit nullam ex hoc dabit consuetudinem nec etiam in die mercati si aliquid ad usum suum emerit Preterea volumus quod quociens mutatio prepositi in villa illa facta fuerit ille qui substituetur istas consuetudines inviolabiliter tenendas jurabit et servientes similiter jurabunt et si aliquis eorum hoc facere noluerit pro eo homines nichil facient donec sacramentum fecerit Hec igitur omnia rata et inconcussa in perpetuum permanere volentes ea presenti pagina commendavimus et sigilli nostri auctoritate confirmavimus Actum publice Senonis in palatio pontificali anno ab Incarnatione Domini MCLXXV