Charter Document - 02350240
| Charter Number: | 02350240 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Lay |
| Charter Type(s): | Confirmation |
| Date: | 1174 |
| Date type: | Internal, A.D. |
| Resource Link(s): |
|
Charter:
Ego Henricus Trecensium comes palatinus notum facio presentibus et futuris quod cum ecclesia Sancti Petri Vivi Senonensis pondus Barri et Trecarum de elemosina antecessorum meorum et mea teneret domnus Odo prefate ecclesie abbas conquestione sua michi monstravit quod magna pars rerum que ponderari debebant non ad pondus suum veniebant sicut ab antiquo consuetudo erat sed ponderis sui consuetudinem evitantes alio deferebantur Unde conquestioni ejus satisfaciens institui ut nullus omnino hominum res ponderari solitas alio quam ad pondus ejus deferat ponderandas Et si quis alibi quam ad pondus dicti abbatis ponderando deprehensus vel ponderasse convictus fuerit mea prius habita emendatione sicut a ministerialibus meis diffinitum fuerit deinde per duos solidos emendatio abbati fiet salva etiam ponderis sui consuetudine Meis itaque ministerialibus et nundinarum mearum custodibus ad quoscumque presentes littere pervenerint precipio ut secundum institutionem meam presenti pagina consignatam super hoc bannum clamari nundinis incipientibus faciant et si quis bannum fregerit mihi forisfactum meum et abbati suum cum ipsius consuetudinis jure faciant habere ita quod nec domus libera nec locus alius liber inde conferat alicui defensionem quin predicta ecclesia ponderis sui consuetudinem ubicumque eam solet accipere habeat et sic res omnes ponderis consuetudinem debentes ad pondus prefate ecclesie de jure debito deferantur Hec autem omnia ut rata permaneant et inconvulsa teneantur litteris annotata sigilli mei impressione firmavi Affuerunt autem hujus rei testes Drogo de Pruvino Daimbertus de Ternantis Girardus Eventatus Salo de Senonis Milo filius prefati Deimberti Josbertus Siccus de Pruvino Actum Trecis anno incarnati Verbi MCLXXIIII Data per manum Guillelmi cancellarii