Charter Document - 02350225

Ge Guillaume par la grâce Dieu arcevesque de Senz et légat dou siége de Rome faisons savoir à touz cels qui sont et qui à venir sont que por la Noeve Vile estre acreuee en laquele l'iglise de Saint Jehan de Senz de l'otroi de l'abbé et de tout le chapitre nos avoit acompaigniez avons otroié à touz les demoranz iki et confermé lez coustumes que li home de Lorriz ont en telle manière que quicunques aura maison en la parroisse de la Noeve Vile por sa maison et por un arpent de terre se il l'a en cele parroche sis deniers de cens paiera tant seulement et se il acquiert iceli au cens de sa maison le tiegne nus hons de la parroisse de la Noeve Vile thonlieu ou autre costume rende de sa norreture ne de sa blée que il aura de son labour ou du labour de ses bestes queles que il soient rende minage et de son vin que il aura de ses vignes onques ne rende forage Nus d'els en besoigne n'en chevauchie aille se il ne veut revenir celi jour à sa maison et quicunques en la parroisse de la Noeve Vile aura sa possession nule chose de cele perdra por nul forfait que il face s'en vers nous ou en vers l'iglise Saint Jehan ou aucun de nos hostes aura forfait Nus à la foire ou au marchié de la Noeve Vile venant ou alant soit pris nec destorbez se il n'a forfait celi jour et nus en jour de marchié ou de foire de la Noeve Vile gage de son plege preigne s'en jour semblable cele plevine n'a esté faite et le forfait de soisante sols à cint sols et le forfait de cint sols viegne à douse deniers et la clameur du prévost à quatre deniers Et nul d'aus avec nos ou avec l'abbé isse de la Noeve Vile tenir plez Nus ne nous ni autre aus homes de la Noeve Vile tailliée ne tolte ne prière face et nus en la Noeve Vile vin à ban vende A la Noeve Vile nos aurons créance en viandes à nostre cels ou de l'abbé ad quinse jors acompliz estre paiée Et se aucuns de cels homes aura eu nostre gage ou de l'abbé ou d'autre il nel tendra pas outre huit jors fors de son gré Et se li uns vers l'autre aura encoru immistié et il se soient accordé sanz enfrainte et cri dou chastel ou du borc le prévost ne mie fait nule chose porce à nos ni à nostre prévost il amendera et se clameur sera fete de ce il leur list accorder els de que il auront paié le droiture jugiée et se li un de l'autre ara fet clameur et li autre envers l'autre nule amende aura fet nule chose por ce à nos ni a nostre prévost il iert à amender et se li uns à l'autre ara deu fere sairement il li list pardoner li Et se les homes de la Noeve Vile auront doné gages de bataille folement et de l'otroi du prévost ançois que li ostages soient livré se seront acordé l'un et l'autre pait deus sols et sis deniers et se li ostages auront esté doné set sols et sis deniers pait l'un et l'autre et se de loiaus homes aura esté faite la bataille les ostages del veincu cent et douse sols paieront Nul de cels nos face corvée li vilain la busche à nostre cuisine et de l'abbé ameneront Nul de cels soit tenu pris se il puet doner plége de venir à droit Et chescun d'aus vende ses choses se il les veut vendre et ses ventes rendues se il se veut de la vile départir franc et quite se départe se en la vile n'aura forfait fet Et quicunques en la parroisse de la Noeve Vile aura mes se cri l'aura soi et par nos et par le prévost aura voulu fere droiture franc et quite ilec demeurt se il ne l'aura voulu fere desques à lieu seur ait nostre conduit Et nus avec aucun pledera fors que por cause de suire sa droiture et de recevoir Es noces de la Noeve Vile li crieur aura nule chose par costume ne la guete Et nul gaeigneur de la parroche de la Noeve Vile qui terre coutit à charrue plus que une mine de froment à touz les serganz de la Noeve Vile doinst par costume quant meisson sera Et se chevalier aucun ou sergant les chevaus ou les autres bestes des homes de la Noeve Vile in nos bois aura trové il nes doit pas mener fors qu'au prévost de la Noeve Vile et se aucune beste de la parroisse de la Noeve Vile chaciée de toriaus ou contrainte de mosches aura entré nostre forest ou haie nule chose por ce devra au prévost amender celi qui la beste sera se il puet jurer que malgré la garde fust ilec entrée Et se aucun gardant li à escient i sera trovée douse deniers por li dorra Et se pluseurs autre tant por chescune pait Es fors de la Noeve Vile ne seront pas porteurs par costume ne les gueteurs ne seront pas par costume Et les homes de Noeve Vile le bois mort à lor us hors la forest preignent Et quicunques el marchié de la Noeve Vile achètera aucune chose ou vendra et par oubliance son tonlieu aura retenu enprès huit jors le pait sanz aucune acheison se il puet jurer que il ne l'eust mie retenu à escient Et se aucun des homes de la Noeve Vile aura esté acusé d'aucun et il ne porra estre prové par tesmoig contre la provance del demandant par sa seule main se descoupera Nus de cele parroisse de quelque chose que il vendra sus semaine ou achètera en jor de marchié en ce marchié por son us nule costume dorra Por ce nos avons establi que toutes les foiz qu'en la vile sera muez li prévost l'un emprès l'autre jurt soi establiement garder toutes ces costumes e ensement li novel toutes les foiz que li sergant seront muez Que ce soit dès or en avant ferme et estable à touz jors nos avons commandé escrire ceste présente page et afermer la de l'autorité de nostre scel Ce fut fet communément à Senz el palais l'arcevesque l'an de l'Incarnation Nostre Seigneur mil et cent et soisante et douse Et plus bas Michiel par la grâce Dieu arcevesque de Senz et Ansiauz de Trainel à touz cels à cui ces lettres venront salut en Nostre Seigneur Nos volons fere à savoir que cum entre nos d'une part et les homes de la Vile Noevesus Venne de l'autre demandé fust tornée des contes avoir par costume et de nostre vin amener à leurs cherretes et de la moisson avoir de leur terres et des costumes des molins Les costumes diligamment enquises qui sont gardées à lor uz en ces manières de cas nos avons otroié as devandiz homes celes meismes costumes à estre gardées c'est à savoir que nos n'aurons nules contes de costume et se nos aurons volu vin amener lesdiz homes le vin de nos vignes et de noz rentes de l'espace de quatorse liées ou là environ à leur chevaus qui traihent seront tenuz amener se par nostre volenté et par la leur ne nos auront doné deniers mes à ce ne porront estre contraint Enseurquetout nul borgois de cele meisme Vile Noeve devra moisson se il ne tient terre de vilennage Les gaaigneurs de terre qui seront hors de vile devront moisson as serganz Li monniers de cele vile sera tenu de costume porter le blé et raporter et vaner et les revanes seront celi qui le blé sera Se li monniers n'aura volu fere si comme nos avons dit devant il porront moudre à quelque molin que il voudront Que ce soit ferm nos avons fet confermer la présente charte dou garnissement de nos seaus Ce fut fet l'an de Nostre Seigneur mil et cent et quatre vinz e disset