Charter Document - 02350222
| Charter Number: | 02350222 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Religious |
| Charter Type(s): | Arbitration |
| Date: | 1172 |
| Date type: | Internal, A.D. |
| Resource Link(s): |
|
Charter:
Ego Garinus Pontiniacensis et ego Giraldus Clarevallensis abbates notum fieri volumus presentibus et futuris quod discordia que versabatur inter fratres de Bono Radio et fratres de Regniaco pro nova grangia eorum et pasturis et pratis de Vaureta ex auctoritate et mandato capituli Cisterciensis convenientes presentibus coabbatibus nostris Gisleberto de Fonte Moriniaci Helia de Callovio Stephano de Petris assensu utriusque partis amicabili compositione terminavimus Decrevimus in primis ut grangia ipsa fratrum Regniacensium permaneat Ceterum de pasturis intuitu pacis et racionis statuimus ut nec fratres de Bono Radio neque Regniacenses ultra sarratas que tendunt a Montemedio usque ad Petrosam aliquo tempore pecora sua ad pascendum nisi communi assensu utriusque partis hinc inde transducant excepto quod Regniacenses hiemis tempore pecora sua ad hiemandum ultra sarratas hoc modo transducere licebit quod viam que tendit a Sano Puteo usque Verrerias et inde usque Interannis versus grangiam de Cavanniaco non transeant Sane Regniacenses tentoria sua construere poterunt in villa que dicitur Fargies vel ubicumque voluerint extra predictam viam ita tamen quod tantum distabunt a via quantum villa de Fargiis distare videtur Porro fratres de Bono Radio infra terminos suos ubi voluerint construere tentoria sua poterunt extra similiter ubi voluerint ita tamen quod remota erunt per dimidiam leugam a tentoriis Regniacensibus nisi communi utriusque partis assensu propinquiora fiant hoc nichilominus observato ne infra prata de Vaureta et tentoria Regniacensia illa de Bono Radio fiant Quecunque vero fratres Regniacenses sive in pratis sive in terris in presentiarum possident integre eisdem permaneant ita quod de cetero terras ad excolendum versus grangiam de Cavanniaco infra duas leugas non acquirant nec prata infra unam Extra vero ubi commodius viderint sine contradictione quantum voluerint acquirant Hanc igitur prescriptam compositionem fecimus presentibus abbatibus Willelmo de Bono Radio Ascelino de Regniaco ipsisque laudantibus sigillis nostris munivimus suppositis testibus monachis scilicet de Bono Radio et de Regniaco Humbaldo cellerario Gauterio de Corbignei Petro Blanco de Bono Radio Giraldo suppriore Teomanno cantore Arnaldo hospitali de Regniaco Actum est hoc anno ab Incarnatione Domini MCLXXII