Charter Document - 02350187
| Charter Number: | 02350187 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1168 - 1176 |
| Date type: | Assigned |
| Resource Link(s): |
|
Charter:
Willelmus Dei gratia Senonensis archiepiscopus apostolice sedis legatus omnibus ad quos littere iste pervenerint in Domino salutem Noverit universitas vestra quod ad presentacionem dilecti filii nostri Odonis abbatis Sancti Petri Vivi Johanni clerico de Sancto Florentino ecclesiam Sancti Michaelis de Arceia divine pietatis intuitu concessimus et donavimus Idem autem abbas eidem ecclesie dimidium modium annone medietatem videlicet ivernagii et medietatem tremesii pro mistiva in perpetuum assignavit Nos autem qui medietatem ville habemus similiter dimidium modium annone medietatem ivernagii et medietatem tremesii assignavimus Et preter hoc ab his qui terram in eadem parrochia cum bobus excolunt habebit unum bichetum frumenti et de his qui terram fodiunt unum bichetum tremesii ad mensuram de Sancto Florentino Habebit etiam omnes minutas decimas ville tam de nostra quam abbatis parte excepto quod abbas canabum pisa et fabas de parte sua ad opus suum retinet Tum vero Johannes omnes oblationes que in altari fient in vita sua habebit et triginta solidos inde predicto abbati persolvet Post obitum autem ejus totum ecclesie beneficium inter abbatem Sancti Petri Vivi et presbiterum dividetur Que ut rata in posterum fixaque permaneant presentis scripti attestacione et sigilli nostri auctoritate confirmamus