Charter Document - 02350162
| Charter Number: | 02350162 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1165 |
| Date type: | Assigned |
| Resource Link(s): |
|
Charter:
Alexander episcopus servus servorum Dei universis Christi fidelibus in anniversario die consecrationis altaris Senonensis ecclesie convenientibus salutem et apostolicam benedictionem Officii nostri nos hortatur auctoritas et debitum exigit caritas operibus pietatis ferventer intendere et Christi fideles ad hoc ipsum propensius invitare Presentibus siquidem litteris universitati vestre volumus innotescat quod nos ejusdem ecclesie que de novo construitur et ex majori parte sui adhuc imperfecta existit necessitatem attendentes prescriptum altare ibidem in octavis Pasce ad honorem beate Marie consecravimus et de beatorum apostolorum Petri et Pauli meritis confidentes his qui in eodem termino vel tribus diebus precedentibus aut sequentibus illuc convenerint ad operis consummationem aliquid de helemosinis suis contulerint viginti dies de injuncta sibi penitentia annis singulis relaxavimus Inde utique est quod nos remissionem illam auctoritate apostolica in perpetuum confirmantes universitatem vestram per apostolica scripta rogamus movemus et exhortamur in Domino atque in remissionem vobis peccatorum injungimus quatenus ad tam sanctum et pium opus complendum aliqua de bonis vobis a Deo collatis pietatis intuitu conferatis ut ipsum vestris adjutum suffragiis ad finem propositum valeat utiliter pervenire et vos eterne retributionis premium possitis exinde feliciter optinere Datum Senonis VIII idus aprelis