Charter Document - 02350150

Nos Hugo Dei gracia Senonensis archiepiscopus et Humbaudus Hostiensis episcopus et Odo dyaconus cardinalis Sancti Nichola in Carcere Tulliani notum fieri volumus presentibus et futuris quod inter Agnetem abbatissam Sancti Juliani Autissiodorensis et Rainardum comitem Joignaci controversia agitabatur super quatuor hominibus Gosberto Anulfo Rainardo Horrico quos predicta abbatissa in potestate Migannie servientes suos constituerat Que controversia cum per querelam predicte abbatisse ad audienciam unius nostrum Hugonis Senonensis archiepiscopi deducta fuisset predictus comes ad audienciam domini pape Alexandri qui tunc Senonis erat appellavit Cum autem utraque pars pro eadem appellatione ad presenciam domini pape convenisset dominus papa eandem causam nobis Humbaudo Hostiensi episcopo et Odoni cardinali audiendam terminandamque commisit Post diutinam autem et prolixam ejusdem cause ventilacionem causa illa per concordiam et transactionem hoc modo finita et determinata est Quod comes predictos quatuor homines et uxores eorum et liberos imperpetuum liberos et absolutos dimisit abbatisse et monasterio Sancti Juliani ita ut in eis nullam habeat justiciam exactionem seu requisitionem seu in uxoribus sive liberis eorum quandiu servientes fuerint et ministeriales predicti monasterii extiterint cum autem servientes seu ministeriales esse desierint habeat in eis sicut in propriis hominibus Sancti Juliani Confessus est etiam et protestatus predictus comes in presencia nostra se nichil [habere] in nemore Sancti Juliani quod est in Otha excepta grueria quod autem predictus comes a controversia illa tam supra predictis hominibus quam supra nemore omnino discessit Hoc fecit intuitu sororis sue que in eodem erat monasterio et respectu gracie et amoris abbatisse ejusdem et nostrarum eciam precum interventu Hujus autem transactionis seriem presentis scripti pagine jussimus annotari et sigillorum nostrorum impressione ex mandato utriusque partis jussimus insigniri Hujus rei testes sunt Stephanus abbas Sancti Remigii Senonensis Guillermus Senonensis ecclesie prepositus Guido Sancti Stephani Autissiodorensis prepositus Stephanus Autissiodorensis archipresbiter magister Henricus Autissiodorensis canonicus Obertus de Madriaco Petrus Rusellus capellanus abbatisse Odo maior abbatisse Rainaudus Chenevox Ex parte vero comitis Garinus filius vicecomitis Senonensis Odo li Boz Stephanus Coemz Hugo prepositus Joigniaci Guillelmus Burgaudus Actum est hoc publice Senonis anno ab Incarnatione Domini MCLXIV Alexandro papa presidente regnante Ludovico rege Francorum Hugone archiepiscopo Senonensi