Charter Document - 02350149
| Charter Number: | 02350149 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Religious |
| Charter Type(s): | Arbitration |
| Date: | 1164 |
| Date type: | Internal, A.D. |
| Resource Link(s): |
|
Charter:
Ego Godefredus episcopus quondam Lingonensis notum fieri volo tam presentibus et futuris quod de quibusdam querelis que inter dominum Alanum venerabilem episcopum Autissiodorensem et Willelmum illustrem comitem Nivernensem agitabantur auxiliante Deo per manum nostram et Wichardi Pontiniacensis et Gaufridi Clarevallensis abbatum de jure et consuetudinibus predictorum episcopi videlicet et comitis inquisita diligentius veritate tali modo amicabili facta est compositio Salva igitur in primis et approbata carta quam inter predecessorem hujus dominum Hugonem episcopum et avum istius comitis comitem scilicet de Carthusia sancte memorie Bernardus Clarevallensis abbas composuit statutum est a nobis ut quidquid in ea difinitum est et ipsorum sigillis firmatum ratum habeatur et tam ab episcopo quam a comite cunctis diebus inviolabiliter observetur Igitur de terra mercati que tam episcopi quam comitis communis est cognitum est quia neutri eorum eam dare alicui vel aliquid ibi facere sine assensu alterius licet excepto quod comes in ea stalla concedere solis cambiatoribus potest tantummodo ad cambiandum que tamen ab eis ad alios usus transferri non possunt ita duntaxat ut si pretium exinde comes habuerit episcopus medietatem habeat de theloneo quod episcopus et vicecomes accipiunt ministeriales comitis nihil se intromittere debeant Terra que Kalende Maii appellatur liquet quia episcopi est unde comes nihil ibi facere debet et quod in ea construxerat edificium cadat Similiter domus juxta pontem quia cognitum est et manifestum constructam eam esse super aquam que a ponte inferius juris episcopi est cadat Equitaturas hominum episcopi vel ecclesiarum ministerialibus comitis capere ad aliquid faciendum vel alicubi mittendum non licet sed et pro munitionibus faciendis vel reficiendis nihil ab hominibus episcopi vel ecclesiarum est exigendum Aliquociens homines episcopi apud ministeriales comitis conqueruntur et eis justitiam facere nolunt nisi pro ipsis se justitient etiam hi quidem non debent nisi de mercato viventes unde manifestum est quia ideo non est eis justitia subtrahenda seu neganda Preterea contingere solebat quod homines comitis hominibus episcopi sua credebant et cum non possent credita rehabere propter hoc res aliorum hominum episcopi capiebant quod dictum est omnino fieri non debere credentie enim a nullo nisi ab eo cui sunt credite sunt requirende Recognitum est preterea quod in feodatis servientibus quos episcopus habet Autissiodori vel alibi etiamsi de mercato vivant comes nullam omnino in foro aut alio in loco pro aliquo forisfacto nisi per episcopum habet justitiam seu potestatem Ut igitur prescripta compositio rata et inconcussa perpetuo maneat episcopi comitis et nostro sigillo eam confirmavimus notatis testibus qui nobiscum presentes interfuerunt Henricus venerabilis Trecensis episcopus et Girardus ejusdem archidiaconus Guido Autissiodorensis prepositus Willelmus decanus Stephanus cantor Stephanus cellarius Garnerius senescallus Stephanus de Petrapertusa milites Stephanus episcopi prepositus Raaudus burgensis Autissiodori Actum anno ab Incarnatione Domini MCLXIV regnante Ludovico Francorum rege Christianissimo
