Charter Document - 02350085

Adrianus episcopus servus servorum Dei dilectis filiis canonicis ecclesie Sancti Stephani Senonensis tam presentibus quam futuris in perpetuum Quotiens illud a vobis petitur quod religioni et honestati noscitur convenire animo nostro decet libenti concedere et petentium desideriis congruum suffragiis impertiri Ea propter dilecti in Domino filii vestris justis postulationibus clementer annuimus et ad exemplar predecessoris nostri bone memorie pape Honorii juxta sanctorum canonum sanctiones statuimus ne in ecclesia vestra aliqua prebenda nisi vacaverit alicui ulterius ullomodo concedatur neve ex aliqua quis a quoquam investiatur Porro si aliquam idoneam personam communis fratrum voluntas vel pars sanioris consilii ut ecclesie vestre canonicus fiat elegerit juxta consuetudinem vobis a sede apostolica roboratam de beneficio ecclesiastico prepositus eum investiat archiepiscopus autem vester grate et sine exactione atque simonia concedat Si vero in aliqua parte archiepiscopi vel canonicorum symoniaca heresis reperta fuerit illud modis omnibus cassamus et in irritum ducimus Preterea claustri vestri libertatem karissimi filii Lodoici illustris et gloriosi regis Francorum vobis precepto firmatam ut futuris perpetuo temporibus quieta et illibata permaneat scripti nostri pagina confirmamus Si qua igitur in futurum ecclesiastica secularisve persona huic nostre confirmationi temere contraire presumpserit sciat se anathematis gladio feriendum Cunctis autem eidem loco sua jura servantibus sit pax domini nostri Jhesu Christi quatenus et hic fructum bone actionis percipiant et apud districtum judicem premia eterne pacis inveniant Amen amen amen Ego Adrianus catholice ecclesie episcopus subscripsi Bene valete Datum Laterani per manum Rolandi sancte Romane ecclesie presbyteri cardinalis et cancellarii III kalend novembris indictione VII Incarnationis dominice anno MCLVIII Pontificatus vero domini pape Adriani IV anno IV