Charter Document - 02341164
| Charter Number: | 02341164 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1131 |
| Date type: | Internal, A.D., Calendar, Papal |
| Resource Link(s): |
Reference Document for this Embedded Document |
Charter:
Innocentius episcopus servus servorum Dei dilectis filiis Hurrico priori et fratribus ecclesie Sancti Amatoris que in Autissiodorensi suburbio sita est regularem vitam professis in perpetuum Ad hoc nobis a Deo pastoralis officii cura commissa est ut beneplacentem Deo religionem laboremus statuere et stabilitatem exacta diligentia conservare Proinde dilecti in Domino filii venerabilis fratris nostri Hugonis Autissiodorensis episcopi religionis siquidem et pauperum amatoris cujus annuente studio et diligenti sollicitudine in vestra est ecclesia religio instituta precibus inclinati vestris rationabilibus postulationibus annuimus et ecclesiam Sancti Amatoris in qua divino vacatis servitio apostolice sedis suffragio communimus Inprimis utique statuimus ut in eadem ecclesia secundum beati Augustini regulam ordo canonicus perpetuis temporibus conservetur et nullus ibi nisi secundum eandem regulam canonicam vitam professus canonicus substituatur Quascunque preterea possessiones quecunque bona impresentiarum juste et legitime possidetis aut in futurum concessione pontificum liberalitate principum oblatione fidelium seu aliis justis modis prestante Domino poteritis adipisci firma vobis imperpetuum et illibata permaneant in quibus hec propriis nominibus duximus annotanda ecclesiam videlicet Sancti Petri de Canvaninis et duas capellas in eadem parrochia capellam videlicet de Orgiaco et capellam de Villa Ferreoli cum decimis et pratis et ecclesiam Sancti Martini de Lano Sicco cum appendiciis suis et quicquid in ecclesia Sanctorum Gervasii et Protasii juris habetis decimas etiam de tribus clausis vinearum quas predictus frater noster Hugo Autissiodorensis episcopus in vestra parochia noscitur possidere Nichilominus decimam de clauso Sancti Salvatoris qui est Casteneti vobis confirmamus Decernimus ergo ut nulli omnino hominum liceat prefatam ecclesiam tenere perturbare aut ejus possessiones auferre vel ablatas retinere minuere aut temerariis vexationibus fatigare sed omnia integra conserventur eorum pro quorum gubernatione et sustentatione concessa sunt usibus omnimodis profectura salva nimirum in omnibus diocesani episcopi reverentia ac justicia Si qua igitur in futurum ecclesiastica secularisve persona hanc nostre constitutionis paginam sciens contra eam temere venire temptaverit secundo tertiove commonita si non satisfactione congrua emendaverit potestatis honorisque sui dignitate careat reamque se divino judicio existere de perpetrata iniquitate cognoscat et a sacratissimo corpore ac sanguine Dei et Domini redemptoris nostri Jesu Christi aliena fiat atque in extremo examine districte ultioni subjaceat Cunctis autem eidem loco justa servantibus sit pax Domini nostri Jesu Christi quatenus hic fructum bone actionis percipiant et apud districtum judicem premia eterne pacis inveniant Amen amen amen Ego Innocentius catholice ecclesie episcopus Datum Autissiodori per manum Emerici sancte Romane Ecclesie diaconi cardinalis et cancellarii octavo kalend octobris indictione decima Incarnationis Dominice anno MCXXXI pontificatus vero domini Innocentii II pape anno secundo