Charter Document - 02340238
| Charter Number: | 02340238 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Lay |
| Charter Type(s): | Confirmation |
| Date: | 1144 |
| Date type: | Internal, A.D. |
| Resource Link(s): |
|
Charter:
In nomine sancte et individue Trinitatis Digna memoratu scripto commendare decrevit antiquitas ne vite brevitate et labili hominum memoria detur iniquis pervertendi facultas Quapropter ego Willermus Nivernensis comes notificandum propono tam futuris quam presentibus quia petitione mea Autisiodorum adductis fratribus a Premonstratensi ecclesia ad basilicam Beati Mariani per consilium domni Hugonis Autisiodorensis episcopi contuli sustentationi eorum suorumque successorum in perpetuum ob remedium anime mee et amicorum meorum terram certis limitibus diffinitam in loco quem vulgus Vetera Prata appellare consueverat nunc autem ipsi fratres cognominant Capellam Dedi etiam molendinum sub stagno meo cujus edificium et excursus aque est in terra Sancti Germani pro annuali censu sex nummorum ad Gurgi villico ipsius Sancti intra octabas kalendarum octobris persolvendorum Factum est autem assensu Ailleldis comitisse uxoris mee filiorumque nostrorum Willelmi et Rainaudi per manum Hugonis predicti episcopi in presentia Gaufridi Charnotensis pontificis et domni Bernardi Clarevallensis abbatis et Rainerus predictorum fratrum primus abbas ab ipso episcopo Hugone donum suscepit Quia vero prefata ecclesia Sancti Mariani omni libera possessione carebat preter hoc solum nostrum benefitium quod eis sufficere non poterat ab eodem episcopo translatis ipsis fratribus ad monasterium sancte Dei genitriscis Marie quod edificavit beatus Vigilius ut eis concesseram ratum in perpetuo promisi Ut ergo sic legitime factum inconvulsum permaneat scriptum sigilli nostri impressione confirmavi subsignatis testibus qui huic secunde collaudationi interfuerunt quinta feria in capite jejunii Autisiodorensi castro ante basilicam Beati Albani Sunt autem hii testes Rainaldus archidiaconus Hugo nepos comitis Willelmus de Nerbona Roscelinus de Sancto Briccio Ulricus de Laigneiaco et Milo decanus Hugo de Merleigniaco Seguinus de Turricula Gaufridus de Vilers Arnaudus de Toceiaco Girardus de Nerbona et Gaufridus filius ejus Seguinus Grossus Robertus prepositus Evrardus de Laigneiaco Petrus Benedictus Andreas coquus Bovo et Rainaldus bersatores Actum est hoc anno Incarnationis Dominice MCXLIIII jam transacto anno tercio quo prima hujus doni facta est traditio