Charter Document - 02340222
| Charter Number: | 02340222 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1143 |
| Date type: | Internal, A.D. |
| Resource Link(s): |
|
Charter:
Precedentium patrum exempla nos ammonent religiosorum studia semper ad meliora provehere et ne quies eorum infestatione aliqua perturbationibus pateat sagaci diligentia providere Ea propter ego Hugo Autissiodorensis episcopus contentionibus que inter regulares ecclesie Beati Petri suburbii Autissiodorensis et presbyterum ecclesie Sancti Peregrini oriri solent de altrinseca adversum se invicem vindicatione parochialis juris modum imponere decrevi cui siquidem malo quia de diversitate parochiarum nasci videtur nullo melius remedio quam earumdem unione obviandum est Tuis igitur dilecte fili Duranne quem in prefata Beati Petri ecclesia priorem constituimus et omnium concanonicorum tuorum petitionibus annuentes ecclesiam Beati Peregrini que de mensa nostra est et ad episcopii nostri jus pertinet cum omnibus ad eam pertinentibus decimis scilicet oblationibus sepulturis necnon et domo que parieti ejusdem ecclesie contigua est tibi ceterisque concanonicis tuis et omnibus vobis in perpetuum ibidem canonice successuris jure perpetuo possidendam concedimus eamque ecclesie vestre atque parochie deinceps inseparabiliter unimus Sed quoniam superius vobis concessa uti jam dictum est de mensa nostra fuisse noscuntur communi omnium vestrum assensu et concessione triginta solidos cum decem libris cere annuatim pro censu in suprascriptis ecclesiis Beatorum Petri atque Peregrini nobis retinuimus et similiter stationem que canonicis Sancti Stephani singulis annis pro ecclesia Beati Peregrini debetur Sciendum autem quod terre S Peregrini preter supradictam domum presbyteri et ecclesiam extra hanc concessionem censumque habentur de quo nimirum censu quia super utramque Sancti Petri scilicet atque Sancti Peregrini ecclesiam conceditur si mihi vel successoribus inferetur injuria super utramque ecclesiam usque ad satisfactionem congruam congrua et eadem secundum culpam ponetur sententia Hujus rei testes sunt Stephanus abbas de Regniaco Gaufridus abbas de Rupibus Guillermus abbas Sancti Martini Rainaudus archidiaconus Goscelinus decanus Gaufridus cantor Guillelmus medicus Andreas de Baldamento Ato archipresbyter Petrus archipresbyter de S Salvatore Belinus canonicus Sabaricus canonicus Stephanus Bunio Guido Orphanus Humbaudus pistor Petrus Dives Actum est hoc anno ab Incarnatione Domini MCXLIII Innocentio II pontifice regnante Ludovico rege Francorum et duce Aquitanorum Guillelmo consule