Charter Document - 02340196
| Charter Number: | 02340196 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1138 |
| Date type: | Internal, A.D. |
| Resource Link(s): |
|
Charter:
In nomine sancte et individue Trinitatis Opere pretium est ac salubre datoribus quocumque in eleemosina pauperibus Christi donaverint seu commutaverint vel vendiderint ea distinctione declarare testibus confirmare posterorum memorie commendare ne presentium incuria litigare cogantur futuri Ea propter ego Garnerius de Lenniaco presenti carta diligenter distinguere curavi quidquid de terra mea dono seu commutatione seu venditione monachi Pontiniacenses habent Dedi ergo Deo et Sancte Marie et monachis Pontiniacensibus laudante uxore mea Ermengarda quidquid habui terre arabilis a rivo Fontis Letardi usque ad Pontiniacum pro campo tamen alte ripe qui infra hos terminos est Dederunt mihi monachi Pontiniacenses hastam Drogonis et quatuor libras et aliam quamdam terram quam Aldricus et Johannes Muscherim coluerunt ex alia parte Fontis Letardi versus Lenniacum et pro aliis tribus particulis terre que etiam infra eosdem terminos sunt dederunt mihi centum solidos Recognita et confirmata sunt hec apud Bunionem grangiam monachorum coram Hugone episcopo Autissiodorensi quondam abbate Pontiniaci Milone decano Achardo viario Poardo fratre ipsorum Guidone Erchenfrido Bono Filio Stephano coquo Johanne de Aponiaco servientibus predicti episcopi Dedi etiam Deo et Sancte Marie et predictis monachis quidquid terre arabilis habui a via Autissiodori usque ad Bunionem grangiam ipsorum monachorum laudante uxore mea ad Fontem Letardi coram his testibus Poardo Mattheo Dominico Umberto Torto filio Anserici Dedi preterea eisdem monachis dimidium prati mei de Sartis a quibus novem libras duos solidos minus accepi Ejusdem tamen prati particulam quam Iterius prepositus de Lenniaco in vadimonio habuit concessi eis ut redimerent et cum reliquo simul haberent laudante uxore mea Ermengarda coram his testibus Poardo Marco filio ejus Aldrico et Bernuino filio ejus Guiberto de Villari Constantio de Lenniaco Villa anno ab Incarnatione Domini millesimo centesimo trigesimo octavo Innocentio secundo papa Ludovico rege Francorum et duce Aquitanorum regnante Hoc actum est apud Chableiam in presentia Godefridi Lingonensis episcopi cujus rei testes sunt Petrus abbas Sancti Johannis Guillelmus monachus et medicus Pontius Lingonensis archidiaconus Hugo Trousellu canonicus