Charter Document - 02340162
| Charter Number: | 02340162 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Lay |
| Charter Type(s): | Promise |
| Date: | 1130 |
| Date type: | Assigned |
| Resource Link(s): |
|
Charter:
Notum sit omnibus tam comtemporaneis quam posteris nostris quod quidam miles nomine Adam filius Hugonis Judicis de Nuceriis solebat tenere quasi hereditario jure tertiam partem decime agriculture Fontismensium fratrum que videlicet decima pertinere videbatur ecclesie de Jugis sed venerabilis pater Stephanus Eduensis episcopus cum in ipso Fontismensi monasterio ordines quodam tempore celebrasset hoc est sabbato post Pentecosten et celebratis jam ordinibus ad propria remeare cepisset accidit ut ipse Adam in comitatu ejus esset quem cum de relinquenda ipsa decima episcopus multum adhortatus esset tandem hec inter eos conventio firmata est ut Adam predictam tertiam partem decime Fontismensibus fratribus relinqueret vel donaret et insuper quicquid de reliquis duabus partibus adquirere posset episcopus vero ei propter hoc triginta solidos daret Tunc Adam de equo suo descendens et accepto uno ex lapidibus in via jacentibus dedit in manum episcopi in signum et confirmationem hujus relictionis sub presentia horum testium Sigivini archidiaconi Lamberti capellani Oberti archipresbyteri Landrici de Prayaco Deinde ipsum lapidem ad Fontismense monasterium Adam ipse afferens obtulit super altare dans loco illi et habitatoribus ejus predictam decimam et accipiens in capitulo per revestituram cujusdam libri societatem et participationem loci illius velut in recompensationem hujus doni presentibus his testibus Gaufrido de Montenesione et Landrico de Prayaco Post aliquos dies apud villam de Nuceriis concesserunt hoc ipsum et confirmaverunt uxor ipsius Ade nomine Regina et duo filii ejus Hugo et Matheus presentibus his testibus Milone de Nuceriis Gaufrido Becardo milite Andrea majore Gualterio Bono Amico de Tornodoro Guidone Besentio Bernuino milite Gaurnerio de Nintriaco Nargoto presbytero Inde habuerunt predicti filii Ade quinque solidos