Charter Document - 02340147

In nomine sancte Trinitatis Stephanus prepositus et tota congregatio S Marie et S Stephani patet diligentibus Deum quod quicquid ad augmentum sancte religionis agitur totum Redemptori nostro manu bone voluntatis offertur nec aliquid pie religiosis personis impenditur quod non ipsi qui caput est religiose viventium conferatur unde et felices illi qui religiosos quosque fovent et tuentur et infelices quicumque persequuntur Hec attendentes etiam ista conferentes ecclesiam S Salvatoris ubi commune cimiterium nostrum est canonica religione decorare dignum duximus maxime instante et rogante glorioso et christianissimo Francorum rege Ludovico quatenus ibidem canonicus ordo floreat et nostris ac predecessorum ac successorum nostrorum animabus salus inde proveniat Presentibus igitur reverendis episcopis Hathone Trecensi et Burchardo Meldensi fratribus et concanonicis nostris Stephano quoque Parisiensi episcopo et Thoma priore S Victoris assistente etiam predicto rege Ludovico et proceribus regni Milone Curtiniacensi et Andrea dapifero comitis Theobaudi predictam ecclesiam Sancti Salvatoris ecclesie B Johannis Evangeliste que nostri juris est conjunximus et venerabili viro Rainardo abbati et successoribus ejus in perpetuum regendam et canonice ordinandam commisimus cum omnibus rebus et possessionibus suis et universis pertinentibus ad eam Nolumus enim eamdem ecclesiam a nobis privare vel a manu nostra interim alienare sed predicte B Johannis ecclesie sicut dictum est consociamus que sic ad nos respicit et in tantum nostri juris existit ut novus abbas quoties opportunitas exigit a conventu B Johannis electus in capitulo nostro per librum regule a preposito nostro de ratione abbatie investiatur secundum instituta patrum nostrorum chirographi nostri conscriptione roborata Erit igitur abbas S Salvatoris et B Johannis nobiscum unus et in Nativitate atque Assumptione B Dei genitricis et in duabus solemnitatibus Sancti Stephani conventui nostro intererit tanquam unus ex nobis nisi forte absens sit vel infirmus Canonici vero S Salvatoris duas hebdomadas sacerdotaliter consummabunt in ecclesia nostra per vices suas respectu duarum prebendarum quas obtinent apud nos jure canonico Processionibus quoque nostris in dominicis diebus bini assistent pro voluntate nostra ita dumtaxat ut fratres nostri Gosbertus et Theobaudus qui nunc in predicta ecclesia consistunt redditus suos integros habeant in vita sua sicut modo post obitum vero eorum vel si ipsi locum dimiserint ambo vel unus extunc canonici B Johannis substituantur residuus tamen qui non dimisit de reditibus suis nihil amittat Ut autem hoc firmum permaneat manu nostra subterfirmare firmatumque tradere procuravimus Actum in capitulo fratrum S Stephani prepositi Theobaudi archidiaconi Gosberti levite Aduini subdiaconi Drochonis subdiaconi Rainardi decani Gosberti presbyteri cum multis aliis quos causa prolixitatis dimisimus Data mense decembri anno Domini MCXXVII indictione V regnante Ludovico rege anno XX Petrus levita et cancellarius signavit