Charter Document - 02340122

Cum divina misericordia sua gratuita bonitate novum monasterium in Burgundia constructum [nempe Cistercium] et regulari disciplina ditaret et copiosa monachorum multitudine adaugeret quidam sacerdos vera religione non mediocriter adornatus Ansius nomine in Autisiodorensi territorio degens rogavit domnum Stephanum novi monasterii abbatem et monachos ejusdem loci ut in loco suo qui Pontiniacus dicebatur monachis et abbate ibidem collocatis abbatiam ordinarent Qui spe regularis discipline propagande incitati voto supradicti sacerdotis se satisfacturos promiserunt si antistes in cujus diocesi locus ille situs erat hoc amplecteretur Dehinc domnus Stephanus abbas et Ansius sacerdos Autissiodorum venientes causam ordinande in predicto loco abbatie beate memorie Humbaldo episcopo aperiunt Quorum studium laudabile pontifex audiens letissimus redditur magnum se sibique commissos spiritualis boni emolumentum nacturos fore confidens si suo tempore gratia divina sancte regule amatores in suo multiplicaret episcopatu Eo tempore assensu ac dono auctoritateque domni Humbaldi episcopi et totius capituli ecclesie sue ac venerabilis sacerdotis Ansii suscepit domnus Stephanus Pontiniacensem ecclesiam ad abbatiam inibi ordinandam Cartam vero caritatis et unanimitatis inter novum monasterium et abbatias ab eo propagatas compositam et corroboratam idem pontifex et canonicorum conventus ratam per omnia habuerunt Videns autem abbas angustiam Pontiniacensis loci in campis et silvis aliisque monachorum profiniis futurorum bone fame illius Willermum regionis comitem obsecrat ut sua largitate locum eundem adaugeat Qui vir Deo devotus et precem supplicantis alacriter suscepit et efficacia beneficentie adimplevit concedens in eodem loco Deo servientibus usuarium in omnibus suis campis silvis aquis piscationi commodis nemoribus et fructiferis ad usum porcorum illorum quod donum et uxor ejus postea laudavit Domina autem Gilla vidua rogatu antedicti abbatis et comitis Willermi donavit monachis in eodem loco futuris partem certis signis determinatam de terra quam ultra aquam que Saina vocatur habebat et de reliqua parte quam sibi retinuit hoc diffinivit ut si aliquis rusticus terram illam quam sub ea tenet monachis illis dare aut vendere aliquo tempore vellet ipsi per omnia hoc placet illud idem et de pratis que rustici ejus tenent laudavit Concessit nihilominus monachis illis usuarium in silva que est ultra aquam Sainam omni tempore et ad usum porcorum et tempore fructuum et aquam eandem ad omnes usus eorum ab illo loco quo tunc molendinum eorum habebatur usque ad molendinum S Porcharie ita scilicet liberam ut nullus sine licentia eorum aut molendinum construere aut piscationem in ea auderet exercere In reliqua vero parte ipsius domine concessit eis piscationem absque laqueis filis connexis Hec dona laudaverunt et concesserunt filie predicte domine Istiberta scilicet et Beata ad quarum jus ista omnia precipue pertinebant Hi sunt testes Willermus comes Milo presbyter Arvinus de Tusci Gobertus capellanus Bartholomeus Joannes molendinarius Stephanus de Forni Rainaldus Milo filius Hugonis judicis Walterus de Glisola Alaldus qui illius loci erat procurator Illis temporibus domnus Joannes de Molendino et conjux ejus Osila et filius eorum Gofridus rogatu antedicti abbatis et comitis Willermi dederunt monachis illam terram que est inter viam qua itur de Vendosa ad S Porchariam et ecclesiam eorumdem monachorum et inter magnum nemus et rivulum quemdam hanc terram concesserunt eis ab omnimoda exactione liberam Post hec dederunt eis usuarium in omni terra quam possidebant in vicinitate monachorum addentes insuper et laudantes ut quicquid monachi per se vel per alios de omni silva eorum extirpando planare potuissent si carrucam non admisissent ipsorum esset et si carruca eamdem terram coluissent Joannes vel sui decimas inde sumpsissent Simili modo donaverunt monachis de campis suis quicquid carruca non coluerint De via autem qua de Pontiniaco pergitur ad Vendosam in dextra parte in omni silva que juris eorum erat dederunt usuarium ad usus porcorum monachorum et hoc cunctis diebus In alias autem silvas Joannis vel suorum non mittant monachi porcos suos donec ipsi suos vel aliorum miserint Si vero ipsi porcos suos vel aliorum usque ad octavam Domini mittere distulerint in silvas abhinc porci monachorum per omnes silvas illas mittantur Hi sunt testes Milo capellanus Laniaci Castri et alter Milo presbyter Willermus comes Nivernensis Theodoricus Helias Stephanus Achardus Hugo et multi procerum ejusdem comitis