Charter Document - 02340093
| Charter Number: | 02340093 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Lay |
| Charter Type(s): | Bequest |
| Date: | 1042 |
| Date type: | Internal, Calendar, Regnal |
| Resource Link(s): |
|
Charter:
In nomine sancte et individue trinitatis Ego Gaufridus comes notum volo fieri quod venit ad nostram presentiam Emma venerabilis abbatissa monasterii Sancte Marie Sanctique Juliani martyris quod est situm extra muros Autissiodorensis civitatis deprecans ut in ipso monasterio Deo servientibus cartam fieri juberem de quibusdam malis consuetudinibus quas domnus Gaufridus pater meus in vita sua vuirpivit Deo et sancte Marie virgini et sancto pretioso Christi martyri Juliano per deprecationem matris mee Adhelaidis consensu et consilio nostro et fratrum meorum Gilduini videlicet archiepiscopi Senonensis et Rainardi et fidelium ministrorumque nostrorum Ego igitur Gaufridus filius ejus post obitum patris confirmo ea que ipse fecit pro remedio anime sue ut qui particeps fui in peccato quod habuit fiam particeps in penitentia qua penituit et in eleemosyna si qua sit In comitatu Senonico et in villa que vocatur Mitiganna vuirpio totas malas consuetudines et usurpationes quas per malos ministros inveni pro anima mea et antecessorum meorum Deo et sanctis ejus acceptis de bonis ipsius loci exceptis banno raptu et incendio ut nullus unquam aliquid accipere presumat in ipsa villa nec minister nec serviens in perpetuum nisi ancille Dei jam dicti monasterii almi Juliani ut possint Deo servire quiete per tempora succedentia Si quis vero quod absit hoc infringere voluerit vel cupiditate cecatus aliquid acceperit cum diabolo et angelis ejus damnatus in inferno cum malis et perditis hominibus ardeat etiam perpetue maledictioni et excommunicationi subjaceat et hec carta firma in eternum permaneat Ut autem firma sit et firma hec nostra vuirpio vigeat firmavi manu propria et manibus fratrum meorum id est archiepiscopi et Fulconis cujus consilio facta est manibusque fidelium meorum tradidi firmandam Actum publice Autissiodoro in monasterio sancti Juliani gloriosi martyris sub die kal martii regnante Henrico Francorum rege anno XII Que quidem carta signata est signo predicti comitis et fratrum ipsius et aliorum plurimorum et sigillata sigillo Gilduini archiepiscopi Senonensis et ejusdem comitis fratris