Charter Document - 02340092
| Charter Number: | 02340092 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1039 |
| Date type: | Internal, Calendar, Regnal |
| Resource Link(s): |
|
Charter:
In nomine sancte et individue trinitatis ego Raynardus comes gravi incommodo detentus ac nimia invalitudine oppressus de rebus que michi a parentibus meis jure hereditario contigerunt tam corpus quam animam meam liberare cupiens trado portiunculam unam possessionis mee que sita est in villa Anciaco ad locum Sancti Michaelis Archangeli ubi me sepeliendum destinavi quatenus ejus precibus adjutus misericordiam apud Deum inveniam et monachi eodem loco Deo servientes omni tempore pro me Dei clementiam exorent et anniversarium diem obitus mei per omne tempus tam in missis quam in vigiliis devota mente celebrari non omittant Dono itaque ad prefatum locum medietatem de omnibus que michi contingunt in ipsa possessione illam scilicet partem quam mater mea Ermengardis in suos usus habuit tam in terris quam in silvis pratis vineis aquis aquarumque decursibus exitibus et reditibus terris cultis et incultis Hec omnia cum consensu et voluntate uxoris mee Herviz et filii mei Harduini sive filie mee Ermengarde cum omni integritate trado dono atque de meo jure in ejus dominationem transfundo eo tenore ut ex hac die liberam exinde habeant libertatem tenendi regendi vel quidquid voluerint ad suum profectum faciendi De servis vero qui in ipsa possessione commanent dono his nominibus Hermerium cum uxore et liberis suis Bernuinum cum uxore et liberis suis Teutbaldum cum uxore et liberis suis Si quis autem heredum meorum vel quorumcumque hominum hanc donationem calumniare ausus fuerit non solum quod cupit [non] obtineat sed insuper XXX libras auri supra dicto loco componat et eternam maledictionem nisi resipuerit et satisfecerit incurrat Et ut nostra traditio stabilis et inconvulse permaneat manu propria subterfirmavi testibusque corroborandam tradidi Signum Raynardi comitis qui firmavit et firmari fecit Herviz comitisse Harduini filii ejus Hermengardis Bernuini Widonis Emilini Richardi Milonis Attonis Osmundi Attonis Emilini Widrici Iterii Roberti clerici Radulfi Aymonis Widonis Raynaldi comitis Wilelmi comitis filii ejus Actum est apud Ternodorum castrum XVII kalendas augusti regnante Henrico rege anno VIII regni ipsius